Stórsigur U19 stelpnanna á Grikkjum

Íslenska U19 landslið kvenna í fótbolta vann stórsigur á Grikklandi í fyrsta leik sínum í undankeppni EM 2020.

Sveindís Jane Jónsdóttir skoraði tvö af mörkum Íslands í 6-0 sigri. Hin mörkin fjögur skoruðu Helena Ósk Hálfdánardóttir, Karólína Lea Vilhjálmsdóttir, Linda Líf Boama og Eva Rut Ásþórsdóttir.

Ísland var með mikla yfirburði allan leikinn og skoraði þrjú mörk í hvorum hálfleik.

Ísland er í riðli með Kasakstan og Spáni, næsti leikur er gegn Kasakstan á laugardaginn. Hann verður leikinn á Würth vellinum í Árbænum.