Tíska og hönnun

Litríkt og rómantískt

Elín Albertsdóttir skrifar
Þessi kjóll er í fallegum litum. Mynstrið er sótt til hönnunar Valentino frá fyrstu árum hans í Rómaborg.
Þessi kjóll er í fallegum litum. Mynstrið er sótt til hönnunar Valentino frá fyrstu árum hans í Rómaborg.

Hún var skrautleg og falleg sýning Valentino í París fyrir nokkrum dögum. Þar var sýnd sumartískan 2020. Henni er lýst sem ljóðrænni, litríkri og kvenlegri. Pierpaolo Piccioli, sérlegur listrænn ráðgjafi hjá Valentino, á heiðurinn af sýningunni. Í loftinu ómaði söngur Audrey Hepburn, Moon River, úr kvikmyndinni Breakfast at Tiffany’s. Í texta lagsins kemur orðið „heart­breaker“ fyrir sem þykir lýsa hönnuðinum Piccioli sem hefur sterkar skoðanir á ýmsum þjóðfélagsmálum. Hann hefur meðal annars unnið gegn útlendingahatri á Ítalíu með því að velja afrískar fyrirsætur.

Þótt hvítur litur hafi verið áberandi á sýningunni voru einnig fallegir litir í boði. Litir sem lífga upp á fallega sumardaga. Piccioli þykir hafa næmt auga fyrir rómantískum stíl og leggur mikla áherslu á smáatriði sem færa líf í hönnunina.

Valentino setti upp sína fyrstu verslun í Róm árið 1960. Piccioli hefur sagt að Róm sé mun umburðarlyndari borg en Mílanó. „Í Róm er fólk víðsýnt og enginn að dæma annan,“ segir hann. „Starf mitt sem hönnuður á að endurspegla þá veröld sem við búum í. Mér finnst ég vera á réttum stað hjá Valentino. Ég er ítalskur, Rómverji, og saga Valentino er hluti af menningu minni og sögu,“ segir Piccioli. Hann er rúmlega fimmtugur og hefur unnið lengi fyrir Valentino sem er kominn hátt á áttræðisaldur.

Græni liturinn var sterkur í sumarlínu Valentino sem sýnd var í París. Hann var í ýmsum fallegum útfærslum.
Ekta sumarkjóll í fallegum sumarlit frá Valentino.
Æðisleg kápa sem verður flott næsta sumar.
Þessi dragsíði kjóll ætti að henta við mörg tilefni á komandi sumri. Væri flottur í brúðkaupsveislu.
Hér er einnig horft til fortíðar í mynstri en liturinn er sérstakur. Blár, grænn, lillablár, bleikur og rauður.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.