Þrjú mörk og engin vandamál hjá Bæjurum

Bikarmeistarar Bayern München hófu titilvörnina með 1-3 sigri á D-deildarliði Energie Cottbus í kvöld. Bayern er þar með komið í 32-liða úrslit bikarkeppninnar.

Robert Lewandowski kom Bayern yfir á 32. mínútu með skoti af stuttu færi eftir að markvörður Energie Cottbus varði skalla Kingsleys Coman. Staðan var 0-1 í hálfleik, Bayern í vil.

Á 64. mínútu skoraði Coman með föstu skoti í fjærhornið og jók muninn í 0-2. Markið má sjá hér fyrir neðan.

Kingsley Coman's moment of brilliance to put the game to bed#DFBPokal#Berlin2020pic.twitter.com/mcWJQseWe3

— The DFB-Pokal (@DFBPokal_EN) August 12, 2019

Leon Goretzka skoraði svo þriðja mark Bayern á 85. mínútu. Berkan Taz minnkaði muninn í 1-3 úr vítaspyrnu í uppbótatíma.

Keppni í þýsku úrvalsdeildinni hefst á föstudaginn þegar Bayern tekur á móti Herthu Berlin. Bayern hefur orðið Þýskalandsmeistari sjö ár í röð.