Sancho skoraði og lagði upp í sigri á Bayern í Ofurbikarnum

Jadon Sancho skoraði eitt mark og lagði upp annað þegar Borussia Dortmund vann Bayern München, 2-0, í Ofurbikarnum í Þýskalandi í kvöld.

Þetta er í sjötta sinn sem Dortmund vinnur þennan titil. Bayern hefur unnið hann oftast allra liða, eða sjö sinnum.

Staðan var markalaus í hálfleik á Signal Iduna Park í Dortmund í kvöld.

Á 48. mínútu komst Dortmund yfir marki spænska framherjans Pacos Alcácer. Hann fékk boltann á vítateigslínunni eftir frábæran sprett Sanchos og skoraði með viðstöðulausu skoti framhjá Manuel Neuer í marki Bayern.

Sancho skoraði svo annað mark Dortmund á 69. mínútu eftir að hann slapp í gegnum vörn Bayern. Lokatölur 2-0, Dortmund í vil.

Keppni í þýsku úrvalsdeildinni hefst um þarnæstu helgi. Bæði Dortmund og Bayern eiga hins vegar bikarleiki í millitíðinni.