Fótbolti

Barcelona lagði Napoli í Miami

Arnar Geir Halldórsson skrifar
Byrjunarlið Barcelona í nótt.
Byrjunarlið Barcelona í nótt. vísir/getty
Spænska úrvalsdeildarliðið Barcelona bar sigurorð af ítalska úrvalsdeildarliðinu Napoli í æfingaleik í nótt en leikið var í Miami í Bandaríkjunum. Þetta var næst síðasti leikur beggja liða á undirbúningstímabilinu en þau munu mætast aftur á laugardag í Michigan.

Börsungar léku án sinnar skærustu stjörnu þar sem Lionel Messi var fjarri góðu gamni vegna meiðsla. Þá var Coutinho ekki með Barcelona en talið er að hann gæti yfirgefið félagið í dag.

Sergio Busquets skoraði fyrsta mark leiksins á 37.mínútu en skömmu síðar varð Samuel Umtiti fyrir því óláni að setja boltann í eigið net og var staðan því jöfn í leikhléi.

Króatinn Ivan Rakitic gerði sigurmark leiksins á 79.mínútu og tryggði Börsungum 2-1 sigur.




Fleiri fréttir

Sjá meira


×