Menning

Rúllandi snjóbolti laðar til sín gesti

Gunnþóra Gunnarsdóttir skrifar
Eygló Harðardóttir, myndlistarmaður ársins, er meðal sýnenda.
Eygló Harðardóttir, myndlistarmaður ársins, er meðal sýnenda. Myndir/Bryndís Reynisdóttir
Enn hefur Bræðslunni á Djúpavogi verið breytt í vettvang stórrar, alþjóðlegrar samtímalistsýningar. Sýningin Rúllandi snjóbolti / 12, var opnuð þar um síðustu helgi.

Hátt á annað hundrað manns voru viðstödd opnunina og við erum í skýjunum,“ segir Bryndís Reynisdóttir, menningarmálafulltrúi á Djúpavogi, um sýninguna Rúllandi snjóbolta / 12. Hún segir forkólfana Ineke og Sigurð Guðmundsson myndlistarmann og starfsfólk Chin­ese European Art Center (CEAC) hafa unnið baki brotnu að uppsetningu hennar, ásamt Þór Vigfússyni listamanni. Svo taka allir bæjarbúar taka þátt, starfsfólk sveitarfélagsins, börnin í bæjarvinnunni, kvenfélagskonurnar … það leggjast allir á eitt við að gera þennan dag sem glæsilegastan.“

Alls taka 24 listamenn frá Íslandi, öðrum Evrópulöndum og Asíu þátt í sýningunni sem er skipulögð af CEAC og er samstarfsverkefni þeirrar stofnunar og Djúpavogshrepps. Hún er meðal stærstu samtímalistsýninga á Íslandi. Spurð hvort eitthvert verk þar veki athygli umfram annað svarar Bryndís: „Það er erfitt að velja eitthvað eitt, þau eru hvert öðru glæsilegra og vekja öll athygli og umræðu.“

Bryndís segir sýninguna opna alla daga til 8. ágúst frá 11-16 og eflaust eigi margir eftir að koma þar við enda ókeypis inn. „Hér er mikið rennerí ferðamanna og Bræðslan er við smábátabryggjuna eins og eggin hans Sigurðar Guðmundssonar. Við höfum ekki nákvæmar tölur um fjölda gesta síðustu ár en viljum meina að um 8.000 manns hafi séð sýningarnar.“

Kristján Guðmundsson og verkið hans.
Nick Renshaw er maðurinn bak við þetta verk.
Guðrún Benediktsdóttir er höfundur þessa verks.





Fleiri fréttir

Sjá meira


×