Tíska og hönnun

Spreðar fokking ást

Þórdís Lilja Gunnarsdóttir skrifar
Hér klæðist Gummi flottum en ekki svo felulegum camouflage-jakka úr Spúútnik og æðisgengnum buxum frá Fashion Nova.
Hér klæðist Gummi flottum en ekki svo felulegum camouflage-jakka úr Spúútnik og æðisgengnum buxum frá Fashion Nova. FRÉTTABLAÐIÐ/STEFÁN

Rapparinn Guðmundur Birgir Bender hefur drungalegan stíl enda lent í ýmsu um dagana. Hann segir besta tískuráðið vera að láta fallegt bros sitt skína. „Mig langar að koma þeim boðskap á framfæri að lífið er æðislegt og þó svo að stundum komi lægðir mun það einungis gera mann sterkari,“ segir Guðmundur sem ólst upp í Grafarvogi og Grímsnesinu og er alla jafnan kallaður Gummi.

Hann er rappari sem gaf út glænýtt lag í byrjun júní, Frið á jörð. Tónlistin á hug hans allan, en líka íþróttir og heimspeki, enda liggur honum margt á hjarta.

„Dagsdaglega reyni ég að lifa jákvæðu lífi og hughreysta aðra. Mér finnst alltof mikið af neikvæðni í þjóðfélaginu, bæði í fjölmiðlum og tónlist þar sem allt snýst um peninga og eiturlyf. Það er bara sorglegt. Dómharka er líka ríkjandi en við ættum aldrei að dæma þá sem eru í kringum okkur því maður hefur ekki hugmynd um hvað sú manneskja hefur gengið í gegnum,“ segir Gummi sem kveðst afskaplega rólegur ungur maður en þó alltaf hress og kátur.

Gummi í hvítri hettupeysu úr New Yorker með grímu frá Svíaríki.

Hann yrkir alla sína texta sjálfur en lögin verða til í samstarfi við Sigga vin hans sem hann segir gera galdra.

„Með tónlistarstílnum vil ég varpa ljósi á „boom bap“ hip hop-senuna. Sjálfur er ég alæta á tónlist en ástríða mín liggur í „boom bap“ og ég lít mikið upp til Forgotten Lores og Skyttanna þegar kemur að textagerð og flæði.“

Stíllinn endurspegli söguna

Gummi segir tískuna vera sér hugleikna.

„Ég held að þannig sé það hjá nær öllum í dag og sjálfur er ég iðulega með hugann við tísku og útlit, en ég læt samt sem áður álit annarra ekki hafa neikvæð áhrif á mig.“

Stíllinn hans Gumma er að mestu sóttur í hip hop-senuna en hann er líka með blandi af því besta.

„Ég vil að stíllinn minn segi mína sögu. Þótt hann geti litið drungalega út þýðir það ekki að ég sé sjálfur drungalegur enda þótt ég hafi eins og margir lent í ýmsu um ævina. Stíllinn minn segir svolítið frá því og náttúrlega líka að það þarf ekki að eyða miklum peningum til þess að líta vel út,“ segir Gummi sem fer í litrík föt og keðjur þegar hann vill slá um sig.

„Mitt besta tískuráð er að vera besta útgáfan af sjálfum sér á hverjum degi og láta sitt fallega bros skína. Það á við um um alla.“

Svarta jakkann keypti Gummi í New Yorker og uppáhalds buxurnar hans eru úr Fashion Nova. Skórnir eru Air Jordan. FRÉTTABLAÐIÐ/STEFÁN

Eftirlætis tískuverslun Gumma er Fashion Nova og Smash, en uppáhalds flíkurnar í fataskápnum eru einmitt hvítar buxur og peysa frá Fashion Nova.

„Bandaríski rapparinn Big L sálugi var mín fyrirmynd þegar kom að klæðaburði og kom mér í að klæða mig eins og ég klæði mig í dag en ég hef þá skoðun á tísku að „skinny jeans“ passi ekki við neitt. Ég nota skart og fylgihluti eftir því hvernig stuði ég er í, en ég er með átta húðflúr sem eru fagurt skart í sjálfu sér,“ útskýrir Gummi sem ilmar af Invictus og One Million angan fyrir menn.

Markmið sumarsins, og reyndar framtíðarinnar, eru skýr hjá Gumma:

„Það er að lifa því lífi sem ég elska og halda áfram að stefna í góða átt. Spreða fokking ást og reyna að bjarga heiminum. Gera gott á hverjum degi, taka burt neikvæðni og hjálpa þeim sem þurfa með brosi og hvatningu til að halda áfram. Lífið er þess virði að lifa. Það vantar bara fleiri verndarengla til að yfirbuga hatrið og þá verður lífið motherfucking æði.“


Hægt er að hlusta á Frið á jörð með Gumma á soundcloud.com/gummi-bender/gummi-bender-fri-j-r

Svarta jakkann keypti Gummi í New Yorker og uppáhalds buxurnar hans eru úr Fashion Nova. Skórnir eru Air Jordan. FBL/STEFÁn


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.