Erlent

Lagði á ráðin um að myrða bestu vinkonu sina eftir milljónaboð á internetinu

Tryggvi Páll Tryggvason skrifar
Fórnarlambið, Cynthia Hoffman.
Fórnarlambið, Cynthia Hoffman. Mynd/Skjáskot

Sex táningar hafa verið ákærðir í Alaska-ríki Bandaríkjanna í tengslum við morðið á Cynthia Hoffman sem framið var 2. júní síðastliðinn. Besta vinkona Hoffman er sökuð um að hafa lagt á ráðin um morðið eftir að maður sem hún hafði kynnst á netinu bauð henni fúlgur fjár fyrir að senda honum myndbönd og ljósmyndir af morði.

Greint er frá ákærunum á vef CNN
en þar segir að hin átján ára Denali Brehmer hafi byrjað að undirbúa morðið á bestu vinkonu sinni eftir að hún kynntist manni á internetinu sem gekk undir nafninu Tyler. Þóttist hann vera milljónamæringur og bauð hann Brehmer að minnsta kosti níu milljónir dollara, um milljarð króna, fyrir að fremja morðið.

Tyler þessi er hinsvegar hinn 21 árs gamli Darin Schilmiller, búsettur í Indiana-ríki í Bandaríkjunum. Hann hefur verið handtekinn í tengslum við málið og mun að öllum líkindum verða ákærður í Alaska fyrir þátt sinn í morðinu. Í gögnum málsins segir að hann hafi einnig beðið Brehmer um að brjóta kynferðislega gegn „átta eða níu ára gömlu barni“ sem og fimmtán ára gömlu barni og senda myndbönd af brotunum til hans.

Í frétt CNN segir að Shilmiller og Brehmer hafi rætt saman um að nauðga og myrða einhvern í Alaska nokkrum vikum áður en Hoffman var myrt. Brehmer fékk nokkra í lið með sér til þess að myrða Hoffman og lofaði þeim í staðinn hlut í verðlaunafé Shilmiller

Plötuðu þau Hoffman með sér í bílferð undir því yfirskyni að þau ætluðu í gönguferð. Stoppuðu þau á leiðinni í rjóðri þar sem hópurinn batt hendur og fætur hennar áður en að einn úr hópnum skaut hana í höfuðið. Losuðu þau sig við líkið í nærliggjandi á.

Símagögn benda til þess að Brehmer hafi sent Shilmiller myndir og myndbönd á meðan ódæðið var framið. Þeir sem komu að morðinu hafa allir verið ákærðir fyrir aðild sína að málinu en tveir af þeim eru undir lögaldri.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.