Bill de Blasio, borgarstjóri New York borgar, hefur staðfest að hann ætli að bjóða sig fram í forvali Demókrataflokksins fyrir forsetakosningarnar á næsta ári. Hann bætist þar með í gífurlega stóran hóp frambjóðenda flokksins. Frambjóðendurnir eru nú 23.

Fregnir bárust af þessari ákvörðun hans í gær en New York Times segir að de Blasio hafi tekið þessa ákvörðun í trássi við ráðleggingar ráðgjafa sinna. Þá sýndi nýleg könnun að 76 prósent íbúa New York töldu hann ekki eiga að bjóað sig fram.

Sjá einnig: Borgar­stjóri New York setur stefnuna á Hvíta húsið

Það hefur aldrei gerst að sitjandi borgarstjóri hafi verið kjörinn í embætti forseta og de Blasio kemur seint inn í kapphlaupið. Fyrstu viðbrögð blaðamanna og sérfræðinga ytra eru að hann eigi ekki mikinn séns á því að ná kjöri.

De Blasio hefur þó ekki gefið mikið fyrir gagnrýnisraddir og segist telja að skilaboð sín um að berjast gegn ójöfnuðu muni ná til hefðbundinna Bandaríkjamanna.