Íslenski boltinn

Skagamenn hafa byrjað betur í ár en á síðustu tveimur Íslandsmeistarasumrum sínum

Óskar Ófeigur Jónsson skrifar
Það er gaman að vera stuðningsmaður ÍA í dag.
Það er gaman að vera stuðningsmaður ÍA í dag. Vísir/Daníel

Skagamenn hafa náð í tíu stig í fyrstu fjórum leikjum sínum í Pepsi Max deild karla í knattspyrnu og nýliðarnir eru á toppnum.

Þetta er betri byrjun en þegar ÍA vann bæði sautjánda og átjánda Íslandsmeistaratitil sinn.

Það er enginn að segja að einhverjir Íslandsmeistaradraumar séu að fæðast á Akranesi en Skagamenn geta glaðst yfir því að þeir eiga nú aftur gott fótboltalið sem er líklegt til að berjast mun ofar í töflunni en þegar þeir voru í úrvalsdeildinni síðast.

Skagaliðið hefur unnið þrjá af fyrstu fjórum leikjum sínum í Pepsi Max deildinni í sumar og er enn taplaust. Mörkin eru líka orðin níu í þessum fjórum leikjum.

Skagamenn urðu síðast Íslandsmeistarar sumarið 2001 en þá var liðið með þremur stigum færra eftir fjóra fyrstu leiki sína. Skagamenn höfðu þá tapað fyrir ríkjandi Íslandsmeisturum KR en þeir unnu aftur á móti Íslandsmeistara Vals á dögunum.

Þegar ÍA vann titilinn fimmta árið í röð sumarið 1996 þá var liðið með einu stigi minna á sama tíma. Skagaliðið frá 1996 var reyndar búið að skora fjórum mörkum minna en hafði tapað einum leik á móti Leiftri á Ólafsfirði.

Árangurinn í fyrstu fjórum umferðunum í sumar er betri en á sex af síðustu sjö Íslandsmeistara árum félagsins eða á öllum nema sumarið 1995 þegar Skagamenn unnu tólf fyrstu leiki sína.

Skagamenn eru búnir að vinna lið í sumar sem varð spá fyrsta (Valur) og þriðja (FH) sæti í deildinni, í árlegri spá formanna, þjálfara og fyrirliða um lokastöðu liða, auk þess að vinna lið sem varð spá sjöunda sæti (KA) og gera jafntefli við Fylki sem varð spáð áttunda sæti.

ÍA hefur því enn ekki spilað við eitt af þeim liðum sem varð spáð í fallbaráttu í Pepsi Max deildinni í sumar.


Skagamenn eftir fjórar umferðir á síðustu Íslandsmeistaraárum sínum:
(Frá því að farið var að gefa þrjú stig sumarið 1984)

[2019 - 10 stig og 9 mörk (+5) - 1. sæti]

2001 - 7 stig og 7 mörk (+3) - 2. sæti
1996 - 9 stig og 13 mörk (+7) - 2. sæti
1995 - 12 stig og 8 mörk (+7) - 1. sæti
1994 - 10 stig og 7 mörk (+5) - 1. sæti
1993 - 9 stig og 9 mörk (+5) - 1. sæti
1992 - 8 stig og 6 mörk (+3) - 2. sæti
1984 - 7 stig og 7 mörk (+1) - 2. sæti



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.