Liverpool í úrslitaleik Meistaradeildarinnar eftir kraftaverk gegn Barcelona

Anton Ingi Leifsson skrifar
Origi fagnar markinu sem skaut Liverpool áfram í kvöld.
Origi fagnar markinu sem skaut Liverpool áfram í kvöld. vísir/getty
Liverpool er komið í úrslitaleik Meistaradeildarinnar eftir eina ótrúlegustu endurkomu í sögu Meistaradeildarinnar en enska liðið sló Barcelona úr leik í undanúrslitum á Anfield í kvöld.

Liverpool tapaði fyrri leiknum á Camp Nou, 3-0, og það voru ekki margir sem bjuggust við endurkomu í kvöld. Einnig var Liverpool án þeirra Mohamed Salah og Roberto Firmino sem glæddi ekki vonir stuðningsmanna þeirra rauðklæddu.

Leikurinn byrjaði vel fyrir Liverpool því fyrsta markið kom strax á sjöundu mínútu. Jordi Alba gerði sig sekan um mistök, Jordan Henderson óð inn í teiginn en skot hans var varið. Origi var vakandi, hirti frákastið og kom boltanum í netið.

Börsungar voru meira með boltann í fyrri hálfleik og stjórnuðu ferðinni án þess að skapa sér mörg tækifæri. Staðan var því 1-0 er liðin gengu til búningsherbergja en Liverpool þurfi tvö mörk í viðbót til þess að tryggja sér framlengingu.







Á níundu mínútu síðari hálfleiks var röðin komin að Georginio Wijnaldum sem kom inn á sem varamaður í hálfleik. Hann skoraði þá með góðu skoti úr teignum, aftur eftir mistök Jordi Alba.

Wijnaldum var ekki hættur. Tveimur mínútum síðar var hann aftur á ferðinni. Frábær fyrirgjöf Xherdan Shaqiri rataði beint á kollinn á Wijnaldum sem stangaði boltann í netið. 3-0 og Liverpool hafði þar með jafnað einvígið.

Það var svo ellefu mínútum fyrir leikslok að Origi skoraði markið sem skaut liðinu í úrslitaleikinn. Arnold var fljótur að taka hornspyrnu, leikmenn Barcelona voru steinsofandi og Origi hamraði boltanum í netið. Ótrúlegt mark og ótrúleg endurkoma.







Þetta er annað árið í röð þar sem Barcelona er hent út úr Meistaradeildinni á svipaðan máta en í fyrra féll liðið úr leik í fjórðungsúrslitum gegn Roma, þrátt fyrir að hafa unnið fyrri leikinn, 4-1. Roma vann síðari leikinn, 3-0, og komst áfram á útivallamarkareglunni.

Liverpool er komið í úrslitaleikinn í þriðja skipti skipti síðan 2007 og annað árið í röð. Leikurinn fer fram 1. júní á Spáni en mótherjinn verður annað hvort Tottenham eða Ajax.

Bein lýsing

Leikirnir






    Fleiri fréttir

    Sjá meira