Thomsen með þrennu og KR í úrslit

Tobias Thomsen skoraði öll mörk KR í 3-2 sigri á FH í undanúrslitum Lengjubikars karla í dag. KR mætir ÍA í úrslitaleiknum 7. apríl.

Thomsen er markahæstur í Lengjubikarnum með tíu mörk. KR hefur unnið alla leiki sína í keppninni með markatölunni 18-2.

Færeyski landsliðsmaðurinn Jákub Thomsen kom FH yfir strax á 4. mínútu. Hinn danski Thomsen jafnaði á lokamínútu fyrri hálfleiks eftir sendingu frá Ástbirni Þórðarsyni.

Færeyski Thomsen kom FH yfir með góðu skoti eftir tveggja mínútna leik í seinni hálfleik en Thomsen jafnaði fyrir KR skömmu síðar.

Hinn danski Thomsen skoraði svo sigurmark KR þegar sex mínútur voru til leiksloka. Lokatölur 3-2, KR-ingum í vil.