Fyrsti sigur Arnars og Eiðs kom í Katar

Íslenska U21 árs landsliðið vann í dag 3-0 sigur á Katar í æfingarleik liðanna en þetta var annar landsleikur Arnars Þórs Viðarssonar og Eiðs Smára Guðjohnsen með liðið.

Ísland gerði 1-1 jafntefli við Tékkland á Spáni á dögunum í fyrsta leik Arnars og Eiðs en strax eftir leikinn hélt liðið til Katar þar sem spilað var í hitanum í dag. Margir leikmenn fengu að spreyta sig.

Það var FH-ingurinn Jónatan Ingi Jónsson sem kom Íslandi yfir á 39. mínútu en annað markið skoraði sonur annars þjálfarans, Sveinn Aron Guðjohnsen. Það mark kom á 62. mínútu, tveimur mínútum eftir að hann hafði komið inn á sem varamaður.

Ísland komst í 3-0 ellefu mínútum fyrir leikslok en markið skoraði Jón Dagur Þorsteinsson. Hann hafði einnig komið inn á sem varamaður skömmu áður. Lokatölur 3-0.

Undankeppnin fyrir EM-U21 sem fer fram árið 2021 hefst í haust en Ísland er í riðli með Írlandi, Ítalíu, Svíþjóð, Armeníu og Lúxemborg en fyrsti leikurinn er spilaður við Lúxemborg 6. september.

Byrjunarlið Íslands í dag:

Elías Rafn Ólafsson

Kolbeinn Birgir Finnsson

Alfons Sampsted

Hjalti Sigurðsson

Torfi Tímoteus Gunnarsson

Jónatan Ingi Jónsson

Daníel Hafsteinsson

Stefán Teitur Þórðarson

Mikael Neville Anderson

Brynjólfur Darri Willumsson

Ari Leifsson