Nýjar kosningar eftir ásakanir um kosningasvindl í Norður-Karólínu

Yfirkjörstjórn Norður-Karólínu í Bandaríkjunum hefur skipað fyrir um að kosið verði aftur um þingsæti á Bandaríkjaþingi eftir að frambjóðandi repúblikana féll frá andmælum við það. Meint kosningasvik hafa verið til rannsóknar og hefur frambjóðandinn viðurkennt að hafa orðið missaga í framburði sínum.

Fljótlega eftir kosningarnar til fulltrúadeildar Bandaríkjaþings í níunda kjördæmi í Norður-Karólínu 8. nóvember komu fram ásakanir um að óprúttnir aðilar á vegum repúblikana hefðu gengið í hús og safnað utankjörfundaratkvæðum frá fólki.

Úrslit kosninganna, sem repúblikaninn Mark Harris vann, voru því ekki staðfest. Aðeins munaði 905 atkvæðum á Harris og Dan McCready, frambjóðanda demókrata. McCready viðurkenndi í fyrstu ósigur sinn en dró yfirlýsinguna síðar til baka eftir því sem ásakanirnar komu fram. Þingsætið hefur verið autt frá því að nýtt þing kom saman í janúar.

Rannsóknin á kosningunum beinist fyrst og fremst að Leslie McCrae Dowless, starfsmanni ráðgjafafyrirtækis sem Harris réði í kosningabaráttunni. Dowless, sem hefur hlotið dóm í sakamáli, hefur áður verið sakaður um bellibrögð í kosningum.

Grunur um að átt hafi verið við utankjörfundaratkvæði eða þeim eytt

Dowless er sakaður um að hafa skipulagt söfnun utankjörfundaratkvæðanna sem hafi síðan verið fargað eða átt hafi verið við þau. Kjósendur demókrata eru sagðir mun líklegri til að skila inn slíkum atkvæðum. Harris lagðist gegn því að kosið yrði aftur. Hann dró andmæli sín til baka í dag eftir að hann viðurkenndi að hafa ekki farið með rétt mál þegar hann bar vitni hjá yfirkjörstjórninni fyrr í dag, að sögn Washington Post.

„Ég tel að boða ætti til nýrra kosninga. Mér er að verða það ljóst að grafið hefur verið undan tiltrú almennings í níunda kjördæmi á slíkan hátt að það kallar á nýjar kosningar,“ sagði Harris.

Áður hafði sonur frambjóðandans, alríkissaksóknarinn John Harris, borið vitni um að hafa ráðið föður sínum gegn því að ráða Dowless vegna þess að hann hefði áður gerst sekur um að brjóta lög í kosningu. Harris eldri hafi ráðið Dowless þrátt fyrir þær ráðleggingar.

Í vitnisburði sínum hafði Harris eldri fullyrt að hann hefði ekki vitað af nokkru misjöfnu um Dowless áður en hann réð hann til starfa fyrir framboðið. Harris segist jafnframt ekkert hafa vitað um meint svik Dowless í tengslum við utankjörfundaratkvæðin.

Dowless neitaði að bera vitni fyrir yfirkjörstjórninni. Hann hefur ekki verið ákærður í tengslum við kosningarnar en New York Times segir að saksóknarar rannsaki nú starfsemi hans og hátterni í kosningabaráttunni.