Neymar óskaði eftir nýju beini í afmælisgjöf

Brasilíska stórstjarnan Neymar hélt upp á 27 ára afmæli sitt um helgina. Hann óskaði sér þess helst að fá nýtt ristarbein í afmælisgjöf.

Neymar meiddist á hægri fæti í leik Paris Saint-Germain og Strasbourg í frönsku bikarkeppninni í janúar og sagði félagið hann verða frá næstu 10 vikurnar vegna meiðslanna.

„Það sem ég óskaði mér helst í afmælisgjöf í dag var nýtt ristarbein,“ sagði tilfinningaþrunginn Neymar í ræðu sinni í afmælisveislunni í París.

„Þá gæti ég verið úti á vellinum í baráttunni að gera það sem mér finnst best, spila fótbolta.“

Meiðslin eru á sama beini í ristinni og Neymar meiddist á fyrir nær nákvæmlega ári síðan. Þá var óttast að hann myndi missa af HM í Rússlandi en svo fór ekki.

Í þetta skipti er búist við að Neymar snúi til baka um miðjan apríl, hann gæti verið að stefna á endurkomu í seinni leik 8-liða úrslita Meistaradeildar Evrópu, það er ef PSG vinnur Manchester United í 16-liða úrslitunum sem hefjast í næstu viku.