Skagamenn voru minnst með boltann en bjuggu til flest færi

Önnur umferð Pepsi Max deildarinnar er framundan um helgina en Instat hefur skilað af sér skýrslu um fyrstu umferðina sem kláraðist um síðustu helgi.

Fylkir og ÍA eru í efstu tveimur sætunum eftir fyrstu umferðina en Breiðablik og FH eru skammt undan eftir góða sigra. Stjarnan, KR, Valur og Víkingur gerðu jafntefli en HK, Grindavík, KA og ÍBV eru enn án stiga.

Hér fyrir neðan má sjá nokkrar staðreyndir úr tölfræðiskýrsli Instat úr fyrstu umferðinni.

FH-ingar voru mest með boltann í fyrstu umferðinni eða í 59% leiktímans á móti HK. FH-liðið hélt boltanum í 34 mínútur og 20 sekúndur í leiknum. Skagamenn voru minnst með boltann í mínútum talið eða aðeins í 22 mínútur og 27 sekúndum.

FH átti líka flestar heppnaðar sendingar (525) og hæsta hlutfall heppnaða sendinga (84%). Skagamenn áttu fæstar heppnaðar sendingar (242) en Eyjamönnum gekk verst að hitta samherja því aðeins 67 prósent sendinga þeirra heppnuðust í leiknum á móti Fylki.

ÍA, Víkingur og Stjarnan bjuggu til flest marktækifæri í 1. umferðinni eða átta hvert lið. HK og Grindavík ráku aftur á móti lestina með aðeins eitt skapað marktækifæri.

HK-liðið fékk aftur á móti flest horn eða níu talsins, tveimur meira en Breiðablik. Grindvíkingar voru síðan oftast dæmdir rangstæðir eða fimm sinnum.

Stjarnan skaut oftast á markið eða 18 sinnum en mótherjar KR-ingar náðu fæstu skotum eða átta. KR hitti aðeins tvisvar markið eins og HK-menn.

Skagamenn brutu oftast af sér eða 23 sinnum það er fimm sinnum oftast en Valsmenn sem voru þeim næstir. FH-ingar og Víkingar brutu sjaldnast af sér eða bara átta sinnum hvort lið.

Stjörnumenn reyndu langflestar fyrirgjafir (29) eða níu fleiri en næsta lið sem var ÍBV. Skagamenn reyndu aftur á móti oftast að sóla andstæðinga sína (35 sinnum).

HK-ingar unnu flestar tæklingar (25) en FH-ingar voru sterkastir í loftinu þar sem þeir unnu 70 prósent skallaeinvíga sinn (23 af 33). Fylkir og Víkingur unnu fæstar tæklingar eða 10 hvort lið.