Innlent

Héraðssaksóknari rannsakar fjárreiður Zuism

Kristín Ólafsdóttir skrifar
Bræðurnir Ágúst Arnar (t.v.) og Einar (t.h.) Ágústssynir eru einu skráðu stjórnarmenn Zuism. Einar hlaut 3 ára og 9 mánaða fangelsisdóm vegna fjársvika í fyrra.
Bræðurnir Ágúst Arnar (t.v.) og Einar (t.h.) Ágústssynir eru einu skráðu stjórnarmenn Zuism. Einar hlaut 3 ára og 9 mánaða fangelsisdóm vegna fjársvika í fyrra. Vísir
Embætti héraðssaksóknara hefur fjárreiður trúfélagsins Zuism til rannsóknar. Þetta staðfestir Ólafur Þór Hauksson héraðssaksóknari í samtali við Vísi og segir rannsóknina vel á veg komna. Hann getur að öðru leyti ekki tjáð sig um hana.

Ekki hefur verið greint áður frá því að embættið hafi fjármál félagsins til rannsóknar, þó að málefni þess hafi verið ítarlega til umfjöllunar í fjölmiðlum.

Minnst var á rannsóknina í máli ríkislögmanns við aðalmeðferð í máli Zuism gegn íslenska ríkinu í fyrradag. Þar kom fram að rannsókn tengd félaginu væri í gangi hjá héraðssaksóknara en ekki skýrt nánar frá henni eða hvað hún varðaði.

Óútskýrðar breytingar á fjárhagnum

Leynd hefur ríkt yfir fjárreiðum Zuism en forstöðumaður þess, Ágúst Arnar Ágústsson, lofar félögum endurgreiðslu á sóknargjöldum. Hann hefur þó aldrei viljað upplýsa um umfang þessara endurgreiðslna eða hvað verði um fjármuni félagsins í ljósi þess að engin starfsemi virðist fara fram á vegum þess.



Ólafur Þór Hauksson, héraðssaksóknari.
Verulegar og óútskýrðar breytingar urðu á fjárhag félagsins á milli áranna 2017 og 2018, ef marka má skýrslur Zúista til sýslumannsins á Norðurlandi eystra sem hefur eftirlit með trúfélögum.

Rekstrarkostnaður félagsins þrefaldaðist, það greiddi laun í fyrsta skipti og það bætti skyndilega við sig tug milljóna króna eignum sem það hafði ekki gefið upp áður.

Dómar tengdra manna

Þá hafa menn tengdir Zuism áður sætt rannsóknum vegna efnahagsbrota. Einar Ágústsson, bróðir Ágústar Arnar, hefur verið skráður stjórnarmaður í félaginu. Hann hlaut þriggja ára og níu mánaða fangelsisdóm vegna fjársvika í fyrra. 

Saman hafa bræðurnir verið kallaðir Kickstarter-bræður í fjölmiðlum  vegna safnana þeirra á fjáröflunarsíðunni Kickstarter. Ein slík söfnun var stöðvuð í tengslum við löggæslurannsókn á sínum tíma.

Sjá einnig: „Lögfræðilegum loftfimleikum“ beitt gegn Zuism á barmi þrots

Fyrsti forstöðumaður Zuism var skráður Ólafur Helgi Þorgrímsson en hann gegndi þeirri stöðu aðeins til febrúar árið 2014. Hann var dæmdur í átján mánaða skilorðsbundið fangelsi og til að greiða 143,4 milljónir króna vegna meiriháttar skattalagabrota vegna reksturs ferðaþjónustufyrirtækisins Ævintýrareisna í júní. Hann hefur sagst ótengdur Zuism.

Eins og áður segir er rannsókn héraðssaksóknara á fjárreiðum Zuism, sem nú stendur yfir, vel á veg komin. Ekki fengust upplýsingar um það hversu lengi hún hefur staðið yfir eða hvenær henni ljúki. Þá getur héraðssaksóknari ekki tjáð sig um það hvort útlit sé fyrir að ákæra verði gefin út í málinu.

Guðrún Sesselja Arnardóttir ríkislögmaður í dómsal í Héraðsdómi Reykjavíkur á föstudag.Vísir/vilhelm

„Málamyndafélagsskapur“ til að komast yfir fé skattgreiðenda

Zuism hefur verið skráð trúfélag síðan 2013. Félagið var endurreist árið 2015 undir þeim formerkjum að félagsmenn fengju sóknargjöld sín endurgreidd. Ágúst Arnar krafðist þess þá að vera aftur gerður forstöðumaður.

Zuism, undir forystu Ágústs Arnars, hefur staðið í málarekstrum við ríkið vegna sóknargjalda sem hann telur félagið eiga að fá greidd. Í nóvember síðastliðnum var ríkið sýknað af kröfum Zuism um að fá dráttarvexti af 50 milljóna sóknargjöldum sem var haldið eftir. Íslenska ríkið var sýknað af þeim kröfum í nóvember.

Nú stefnir Zuism ríkinu vegna þess að fjársýsla ríkisins stöðvaði greiðslur á sóknargjöldum í upphafi þessa árs. Sýslumaður vísar til óvissu um að Zuism uppfylli skilyrði laga um trú- og lífsskoðunarfélög.

Um þessi skilyrði var einmitt deilt við aðalmeðferðina í fyrradag. Guðrún Sesselja Arnardóttir ríkislögmaður sagði m.a. að verulegur vafi léki á því hvort trúfélagið væri starfandi sem slíkt. Þá væri félagið „málamyndafélagsskapur“, hvers tilgangur væri að komast yfir fjármuni skattgreiðenda.

Gunnar Egill Egilsson lögmaður Zuism sagði við aðalmeðferðina að fjármunum félagsins væri haldið í gíslingu. Það væri á barmi þrots og hefði til að mynda ekki kost á að greiða Gunnari Agli sjálfum fullnægjandi upphæð fyrir vinnu sína. 


Tengdar fréttir




Fleiri fréttir

Sjá meira


×