Liverpool fyrsta nýja liðið í 39 ár í þessum klúbbi

Liverpool liðið tapaði bara einum deildarleik á tímabilinu en tókst ekki að vinna ensku deildina. Fyrir vikið duttu lærisveinar Jürgen Klopp inn í mjög fámennan klúbb.

Liverpool er aðeins fjórða liðið í sögu fimm bestu deilda Evrópu sem verður ekki meistari þrátt fyrir að tapa ekki meira en einum leik á tímabilinu.

Fimm sterkustu deildir Evrópu eru enska úrvalsdeildin, spænska deildin, ítalska deildin, þýska deildin og franska deildin.

Liverpool fékk 97 stig í 38 leikjum eða 2,55 stig að meðaltali í leik. Liðið vann tveimur leikjum færra (30) en meistaralið Manchester City (32) og gerði fimm fleiri jafntefli, fimm á móti tveimur. City komst því upp með að tapa þremur fleiri leikjum eða fjórum á móti einum hjá Liverpool.

Liverpool er fyrsta félagið í 39 ár sem kemst í þennan klúbb en síðasta lið á undan Liverpool var spænska liðið Real Sociedad tímabilið 1979 til 1980.

Equipos con menos de 2 derrotas que NO fueron campeones (en las 5 grandes ligas):

Torino 1976-77 (1 derrota).

Perugia  1978-79 (0 derrotas).

Real Sociedad 1979-80 (1 derrota).

LIVERPOOL 2018-19 (1 derrota).

Pues si, Jürgen. No se puede creer. Pero es así. pic.twitter.com/yiBtjcAX0u

— MisterChip (Alexis) (@2010MisterChip) May 12, 2019

Real Sociedad endaði einu stigi á eftir Real Madrid þetta tímabil. Real Madrid tapaði þremur leikjum en Real Sociedad aðeins einum. Vandamálið var að Real Sociedad gerði fjórtán jafntefli í leikjunum 34.

Góðu fréttirnar fyrir Liverpool er að Real Sociedad varð spænskur meistari næstu tvö tímabilin eða 1980–81 og 1981–82. Liðið tapaði aftur á móti átta leikjum 1980-81 og sjö leikjum 1981-82. Svona getur fótboltinn oft verið skrýtinn.

Fyrstu tveir meðlimirnir voru aftur á móti frá Ítalíu.

Tímabilið á undan, 1978-79, fór Perugia taplaust í gegnum ítölsku deildina. Perugia endaði samt þremur stigum á eftir meistaraliði AC Milan. Perugia gerði 19 jafntefli í 30 leikjum og vann bara ellefu leiki eða sex færri leiki en AC Milan. Þetta er besti árangur Perugia frá upphafi.

Fyrsta félagið í þessum klúbb var lið Torino á Ítalíu. Torino var stofnmeðlimur klúbbsins tímabilið 1976 til 1977 þegar liðið tapaði aðeins einum leik. Torino varð þá í öðru sæti, einu stigi á eftir nágrönnum sínum í Juventus. Torino gerði 8 jafntefli og vann 21 leik. Juventus liði vann 23 leiki og tapaði bara einum leik meira.

Líkt og Liverpool nú var Torino með tvö öfluga menn í framlínunni sem voru meðal markahæstu mennirnir en það vpru þeir Francesco Graziani (Markakóngur með 21 mark) og Paolo Pulici (16 mörk) sem voru í þá daga kallaðir markatvíburarnir.

Torino varð ítalskur meistari árið á undan (1975-76) en hefur aldrei unnið síðan.