Messi gæti spilað gegn Inter tveimur vikum eftir handleggsbrot

Lionel Messi er á meðal þeirra sem ferðast með Barcelona en liðið á leik við Inter í Meistaradeildinni í vikunni.

Fyrirliði Börsunga æfði á miðvikudaginn einungis ellefu dögum eftir að hafa handleggsbrotnað í 4-2 sigri á Sevilla á Camp Nou í síðasta mánuði.

Fyrst var reiknað með því að Argentínumaðurinn yrði frá í þrjár vikur en nú er talið að hann gæti komið við sögu í leiknum gegn Inter í vikunni.

Læknateymi Börsunga er þó ekki búið að gefa grænt ljós á að Messi geti spilað gegn Ítölunum í vikunni en það skýrist á næstu sólahringum.

Börsungar hafa unnið fyrstu þrjá leiki sína í Meistaradeildinni og með sigri gegn Inter á þriðjudaginn tryggja þeir sér sæti í 16-liða úrslitunum.