Vardy: Viljum heiðra minningu eigandans

Leikmenn Leicester City voru ekki í nokkrum vafa um að spila leikinn gegn Cardiff City um helgina þrátt fyrir harmleikinn um síðustu helgi er eigandi félagsins og fjórir aðrir létust í þyrluslysi.

„Við verðum að sjá til þess að hann verði stoltur af okkur á vellinum,“ sagði framherji Leicester, Jamie Vardy.

„Það var ekki auðveld ákvörðun að samþykkja að spila þennan leik en við vitum að Vichai hefði viljað sjá okkur spila. Er við áttuðum okkur á því var ákvörðunin auðveldari.“

Minning Vichai Srivaddhanaprabha verður heiðruð fyrir alla leiki helgarinnar og leikmenn ensku úrvalsdeildarinnar verða allir með sorgarbönd.

Leikmenn Leicester eru síðan sagðir vera á leið til Tælands eftir leikinn í jarðarför Srivaddhanaprabha. Hún hefst á laugardag og mun standa yfir í allt að viku.