Það heitasta á heimilið fyrir jólin

Hvað er mest í tísku innanhúss í vetur? Hvaða stíll er ráðandi í stofum, eldhúsum og baðherbergjum hjá fólki í dag? Hvaða litir eru vinsælastir á veggi heimilisins? Vala Matt fór í leiðangur og spurði nokkra innanhússarkitekta og hönnuði í innslagi sem var í þættinum Ísland í dag á Stöð 2 í gær. Vala byrjaði á að heimsækja innanhússarkitektinn Berglindi Berndsen.

En Berglind hefur verið einn af vinsælustu hönnuðum landsins og hún sýndi Völu dæmi um það heitasta í dag í efnisvali og nýjustu litunum fyrir þá sem vilja breyta til. Og þar kom ýmislegt skemmtilegt í ljós.

Vala fór einnig og hitti ritstjóra Húsa og híbýla Sigríði Elínu Ásmundsdóttur því hún er sannarlega með puttann á púlsinum þar sem í tímaritinu er fjallað um íslensk heimili, þróun útlits heimilanna skoðuð og við sjáum þar hvað er helst í tísku. Og einn af áhrifavöldunum í heimi innanhúss tískunnar er listakonan Guðlaug Ágústa Halldórsdóttir en hún hefur verið áberandi í sjónvarpi undanfarin ár sem stílisti og stílráðgjafi.

Og þessa dagana vinnur Gulla einnig sem fasteignasali og hefur því einstakt yfirlit yfir fjölbreytt húsnæði landsmanna. Gulla er algjör sérfræðingur í litaráðgjöf sem hefur alveg slegið í gegn. Vala heimsótti Gullu og skoðaði hvernig hún hefur verið að gera tilraunir og málað flest herbergi hússins í dökkum litum og hún málaði einnig loftin í sama lit. Hér er skemmtilegt að fá hugmyndir til þess að flikka upp á heimilið fyrir Jólin.

Hér að neðan má sjá innslagið í heild sinni.