Neville og Carragher rifust um eyðslu Spurs: „Skilur þú ekki að völlurinn kostar 600 milljónir?“

Gary Neville og Jamie Carragher háðu margar barátturnar á fótboltavellinum í gegnum árin. Þrátt fyrir að vera komnir af vellinum og inn í sjónvarpsver er enn hiti á milli þessara fornu fjenda.

Neville og Carragher eru sérfræðingar þáttarins Monday Night Football á Sky Sports. Þátturinn fór í loftið í gær þegar Manchester City var nýbúið að vinna 1-0 sigur á Tottenham á Wembley.

Þeir félagar tókust á í því sem ekki er hægt að lýsa öðruvísi en heitu rifrildi yfir Tottenham og árangri þeirra.

„Tottenham hefur byrjað tímabilið mjög vel en nokkur lið hafa byrjað betur. Þeir fengu enga nýja leikmenn inn í sumar og mér líður eins og þetta sé liðið sem við vorum að horfa á fyrir tveimur árum. Það lið var frábært og vann næstum deildina, en ég held að ef þú stendur kyrr þá missir þú af lestinni,“ sagði Carragher.

„Það hversu lítið þeir eyða á leikmannamarkaðinum er ekki sjálfbært og er ekki að skila þeim í Meistaradeildina á hverju ári. Snilli Pochettino í að ná því besta út úr leikmönnunum gerir það.“

Neville var ekki sammála Liverpool-manninum.

„Þú ert að biðja þá um að eyða meiri pening þegar þeir eru í skuld sem vex með hverjum deginum því framkvæmdin á vellinum dregst á laginn. Þú getur ekki beðið um það,“ sagði Neville.

„Pochettino vissi að hann fengi ekki 500-600 milljónir til þess að eyða í leikmenn þegar hann kom til Tottenham. Hann vissi hver Daniel Levy [eigandi Tottenham] var þegar hann tók starfið.“

„Þeir eru að horfa til framtíðar með því að byggja nýja leikvanginn. Í þrjátíu ár vantaði allt bakbein í Tottenham. Ef þú komst 2-0 yfir gegn þeim þá vissiru að þú myndir vinna. Nú erum við með besta, erfiðasta Tottenham-lið sem við höfum séð.“

„Hjálpum þeim þá,“ greip Carragher inn í. „Þeir eru með besta stjórann og bestu leikmennina í þrjátíu ár, reynið að ýta þeim upp á næsta stall.“

„Tottenham náði ekki að fá Sadio Mane út af launagreiðslum. Sama með Georginio Wijnaldum. Harry Maguire hefði getað farið til Tottenham en hann fékk hærri laun hja Leicester,“ sagði Carragher.

„Við erum alltaf að heyra fólk tala um að þeim líki ekki við lið sem eyða meira en þau ættu að gera. Tottenham rekur sitt félag mjög vel. Daniel Levy er besti stjórnarmaður í fótboltaheiminum,“ sagði Neville þá.

„Levy lætur umboðsmenn ekki stjórna sér, né knattspyrnustjóra eða leikmenn. Þeir eru allir á langtíma samningum og hann missir leikmenn mjög sjaldan á frírri sölu. Hann rekur félagið mjög vel og heldur í sína kostnaðaráætlun og þú getur ekki skammað hann fyrir það.“

„Þeir eru í Meistaradeildinni á hverju ári. Hvernig getur eyðsla Tottenham síðan Pochettino tók við bara verið 29 milljónir punda [samtala heildareyðslu og heildartekjum á leikmannamarkaðinum]? Stoke eyddi 60 milljónum og þeir eru í B-deildinni?“ spurði Carragher þá forviða.

„Hvernig hefur þú ekki áttað þig á því að nýi völlurinn kostar 600 milljónir?“ spurði Neville þá til baka.



Þeir félagar rifust enn frekar um eyðslu Tottenham og má sjá frábæra klippu af því hér.