Fjölskylda Zaha fengið morðhótanir eftir leikinn gegn Arsenal

Wilfried Zaha, framherji Crystal Palace, hefur orðið fyrir kynþáttafordómum og fjölskyldu hans hafa borist morðhótanir eftir leik Palace um helgina.

Palace fékk tvær vítaspyrnu í 2-2 jafntefli gegn Arsenal en Zaha fór niður í baráttunni við Granit Xhaka er lítið var eftir af leiknum. Palace jafnaði úr vítaspyrnunni og tryggði stig.

Eftir leikinn kom Xhaka í viðtal og viðurkenndi mistök sín. Svisslendingurinn sagði að atvikið hafi verið klárt brot en þó hafa einhverjir stuðningsmenn Arsenal horft öðrum augum á þetta.

Zaha skrifaði á Instagram síðu sína í gærkvöldi að hans líf væri gott þrátt fyrir allt það hatur sem honum hefur borist; þar á meðal morðhótanir til fjölskyldu hans og kynþáttafordómar.