Segir konur meira í andlegu ofbeldi og karlar í líkamlegu

Dyraverðir óttast um öryggi sitt í miðbæ Reykjavíkur og það ekki að ástæðulausu en á dögunum varð dyravörður fyrir fólskulegri líkamsárás í miðbænum. Þar hlaut hann alvarlega áverka, meðal annars mænuskaða. Sindri Sindrason ræddi við dyravörð í Íslandi í dag á föstudagskvöldið.

„Konurnar beita oftar andlegu ofbeldi en karlar líkamlegu,“ segir Davíð Blessing, en dyraverðir verða stundum hræddir í vinnunni, hafa stofnað félag og vilja meira samstarf við lögregluna. Hann sagði áhugaverðar sögur úr skemmtanalífinu á föstudaginn.

„Það er kominn tími á breytingar til að við þyrftum ekki að horfa upp á svona aftur,“ segir Davíð en dyraverðir í miðbæ Reykjavíkur vilja aukin réttindi í starfi sínu. Þeir vilja fá að nota handjárn til að yfirbuga gesti skemmtistaða sem sýna af sér óæskilega eða ógnandi hegðun.

„Það þarf að tryggja betra samstarf við lögreglu. Lögreglan er klárlega undirmönnuð til þess að sinna sínu starfi eftir bestu getu. Oftar en ekki er viðbragðstíminn of langur og of mikil bið.“

Davíð segir að það gangi ekki að dyraverðir þurfi að fara sömu leið og aðrir þegar upp koma vandamál. Hann segir að neyðarhnappur væri eitthvað sem vert væri að skoða.

„Öryggisverðir sem eru að passa Smáralindina eru með neyðarhnapp, en ekki við. Það þarf einnig að vera staðalbúnaðir að dyraverðir séu í hnífstunguvestum. Það er því miður sorglegi sannleikurinn að þetta þurfi að vera staðalbúnaður.“

Hér að neðan má sjá innslagið í heild sinni.