Vorspá Siggu Kling – Krabbinn: Ekki tengja tilfinningar við ákvarðanir

Elsku Krabbinn minn, þú ert að plana og plana, laga og breyta, en akkúrat þegar þú ert með hugann við þetta allt er nákvæmlega eitt sem gerist sem er lífið sjálft, sem breytir öllum plönum. Svo í guðanna bænum elskan mín hugsaðu frekar eins og alkóhólistinn, bara einn dag í einu, eða bara ein klukkustund í einu myndi duga.

Þó þér finnist ekki þú getir ekki áttað þig á því hvaða hlutverki þú gegnir í lífsins bíómynd skaltu vita það með fullri vissu að það er sjálft aðalhlutverkið sem er svo sannarlega tilgangurinn þinn, hver vill annars vera í aukahlutverki? Og þegar þú ert að forma og passa, skoða og hafa allt á hreinu þá gerist ekki neitt.

Á næstu mánuðum áttu eftir að sjá að orka þín hækkar og kraftur þinn og ákveðni verða augljós. Að sjálfsögðu muntu efast stund og stund, en hversu eðlilegt er það ekki? Það er búin að vera svo mikil tilfinningahringiða í kringum þig en þegar þú tengir tilfinningar við ákvarðanir verður ekki rétt útkoma. Það tekur oft mörg ár fyrir þig að taka rétta ákvörðun en mundu að allt gerirst á hárréttum tíma og það er engan veginn í þínum höndum. Síðasta ár hefur þú komist í gegnum svo ofboðslega margar hindranir sem að hafa kennt þér að vita í hverju þínir styrkleikar liggja og ef þú skoðar hefðirðu alls ekki vilja missa af neinu.

Það er svo margt að gerast og þú verður þú að læra að velja og hafna í hvaða partýi þú vilt vera og hverjum verður boðið. Það eru svo margir möguleikar opnir fyrir þér, en þegar það eru of margir möguleikar þá getur þú misst máttinn og þá verður lífið eins og endursýning af þættinum aftur og aftur. Hugrekki er orðið sem neglir niður maí mánuð og ef þú bara spyrð færðu miklu fleiri já en nei.

Þú ert svo sannarlega hér núna og ekki í fortíðinni eða framtíðinni svo láttu hvorugt stjórna þér því það kemur þér ekki þangað sem þú vilt fara hvort sem er. Mikið af veislum, ferðalögum og skemmtilegum uppákomum eru framundan svo segðu bara já við hinu óvænta og já við flestu þó það sé alls ekki í eðli þínu þegar þú færð tilboð og áskorun sem þú myndir sjá eftir að hafa ekki nýtt þér.

Ef ekkert hefur gengið í ástinni undanfarin ár hefurðu greinilega bara verið á villigötum svo setningin til þín er: Segðu já við öðruvísi ást eða öðruvísi týpum en þú hefur áður gert því í þeim liggur ástin!

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari, Davíð hinn góði skóari í Hafnafirði, Stefán Árni Pálsson fréttamaður, Guðni Th. forseti Íslands, Friðbjörn Europartakóngur, Yesmine Olsen, höfundur og framleiðandi, George Michael, Kristófer Helgason, dagskrágerðamaður, Nuno Alexandre Bentin Servo veitingahúsakóngur, Helga Hafsteinsdóttir, hárgreiðsluséní á Akureyri, Íris Björk Tanya frumkvöðull og hönnuður.