Neymar grýttur í Marseille: Algjör vanvirðing

Brasilíumaðurinn Neymar fékk vægast sagt óblíðar móttökur hjá stuðningsmönnum Marseille þegar PSG heimsótti Stade Velodrome í stórleik helgarinnar í frönsku úrvalsdeildinni.

Gera þurfti hlé á leiknum eftir að stuðningsmenn heimamanna fleygðu öllu lauslega inn á völlinn þegar Neymar var að taka hornspyrnu.

„Þetta er algjör vanvirðing. Ekki bara í minn garð heldur líka leikmanna Marseille. Það er ekki rétt að haga sér svona,“ sagði Neymar, ómyrkur í máli eftir leikinn þrátt fyrir öruggan 0-2 sigur PSG.

Neymar var ekki sá eini sem varð fyrir því að fá gusu af smáhlutum yfir sig því stuðningsmenn Marseille hlífðu ekki óskabarni þjóðarinnar, Kylian Mbappe. Alls ekki nýtt vandamál á heimavelli Marseille því Neymar og félagar lentu í svipuðum hremmingum á síðustu leiktíð.

„Þeir sem stjórna Ligue 1 verða að fara að taka á þessu því þetta getur ekki haldið svona áfram. Í hvert skipti sem við komum hingað er hlutum kastað í okkur, þar á meðal glerflöskum,“ segir Neymar.