Þór/KA afgreiddi Wexford í fyrri hálfleik og spilar úrslitaleik gegn Ajax

Þór/KA er með fullt hús stiga í undanriðli Meistaradeildar kvenna sem leikinn er í Belfast en í kvöld vann liðið 3-0 sigur á Wexford Youths.

Þór/KA vann 2-0 sigur á Linfield í fyrsta leiknum og er því búið að skora fimm mörk og fá ekkert á sig í fyrstu tveimur leikjunum.

Þær eru með fullt hús stiga og spila úrslitaleik gegn Ajax, sem er einnig með fullt hús stiga, en leikurinn verður spilaður á mánudaginn.

Íslandsmeistararnir afgreiddu þennan leik á fyrstu átján mínútunum. Sandra María Jessen kom þeim yfir á fimmtu mínútu og Hulda Björg Hannesdóttir tvöfaldaði forystuna fjórum mínútum síðar.

Það var svo á átjándu mínútu leiksins er Hulda Ósk Jónsdóttir kom Þór/KA í 3-0 og leik lokið í fyrri hálfleik. Vel gert hjá norðanstúlkum.