Vorspá Siggu Kling – Bogmaðurinn: Skaltu ekki líta eftir snobbuðu fólki

Elsku Bogmaðurinn minn ég veit að stundum missirðu kraft og finnst þú vera að drukkna og það er vegna þess að enginn getur farið í gegnum lífið án þess að hafa farið niður til þess að geta farið upp.

Þú verður að skilja að hefðbundið staðlað líferni hentar þér alls ekki, um leið og þú þróar andlega líðan þína og skoðar betur sálfræði þá sérðu hvað þú vilt gera.

Í maí er fullt tungl í Bogmanni og þar af leiðandi mun þessi orka, vororkan taka stjórn og hjálpa þér að deila eigin tilfinningum af rausn. Þessi rausnarlegu tilburðir gera þig einstakan í þinni röð þú hefur ótrúlegan áhuga á þeim sem aðrir hundsa og vilja ekki veita neina athygli sem mun færa þer ótal tækifæri.

Ef þú ert á lausu skaltu ekki líta eftir snobbuðu fólki, það dregur úr þér kraaft og sjálfstraust, snobbað fólk er hvort sem er alltaf ekki nokkur skapaður hlutur.

Vorið mun koma þér verulega á óvart því allt í einu gengur allt upp og ég veit þú þarft að beita þig sjálfsaga sem er eitthvað sem ég þoli ekki, hvorki að aga börn eða sjálfa mig, en það væru svo sérstaklega smart skilaboð til  þín að þú hugsaðir eina hugmynd í hverri viku og myndir standa við hana. Það er svo þvílíkur máttur sem mun fylgja þessu og mátturinn tengist því að vera með svolítið af Pollýnnu hugsun og hugsa: Hvað er það versta sem getur gerst fyrir þig? Smáatriðin geta nefnilega orðið að stórum skítahaug, svo hentu litlu vandamálunum í burtu því í raun og veru eru þau bara í tittlingaskítur í stóra samhenginu.

Ef þú ert á lausu muntu komast í kynni við sanna ást en hvað er sönn ást, það er eitthvað sem gerist auðveldlega og smellur einn, tveir og þrír. Þú átt það til að vera heltekinn af ímyndaðri ást, það getur sest að í huga þínum og lamað orku þína. Að sjálfsögðu er ástin að vissu leyti blekking því að í raun er hún bara vinátta og tenging við manneskju sem þú getur slakað á með.

Stress og vitleysa í samböndum er eitthvað sem þú þarft ekki á að halda. Í vor kemur þú sjálfum þér virkilega á óvart því þú lokar því sem þér líkar ekki við og opnar fyrir flæði sem lætur þig ganga inn í sumarið með sterkan kynþokka og fallega þrjósku. Það á enginn eftir að stoppa þig vegna þess að þér á eftir að finnast það auðvelt að stroka út vandræðafólk sem velur það að halda þér niðri. Þú hefur svo mikla hæfileika til að elska og gefa allt í kringum þig, láttu engan segja þér fyrir verkum, heldur láttu verkin tala.

Setningin þín er: Þú ert á lífi til að njóta

Knús og kossar, þín Sigga Kling

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt, Kjartan Kjartansson athafnamaður.