„Keflavíkurflugvöllur er ekki byggður upp af ríkisfé“

Forstjóri Isavia segir beina ábyrgð skattgreiðenda þegar kemur að uppbyggingu Keflavíkurflugvallar mjög litla þar sem völlurinn sé ekki byggður upp af ríkisfé. Hann telur ljóst að stórir erlendir aðilar hefðu áhuga kaupa hlut í vellinum yrði farið í útboð á hluta hans.

Ráðherra ferðamála, Þórdís Kolbrún Reykfjörð Gylfadóttir, sagði í fréttum Stöðvar 2 í gær að ekki væri skynsamlegt að skattgreiðendur bæru alla ábyrgð á rekstri Flugstöðvar Leifs Eiríkssonar og sagði mikilvægt að skoða þann möguleika hvort einkaaðilar kæmu að uppbyggingu vallarins.

Forstjóri Isavia, Björn Óli Hauksson, segir ábyrgð skattgreiðenda litla þar sem fyrirtækið standi vel.

Gert er ráð fyrir að á næstu 25 árum tvöfaldist stærð Flugstöðvar Leifs Eiríkssonar með tilheyrandi kostnaði. Flugstöðin er í eigu Isavia sem er opinbert hlutafélag alfarið í eigu ríkisins.

Björn Óli segist enga afstöðu taka hvort rétt sé að skoða möguleika þess að einkaaðilar komi að uppbyggingu flugstöðvarinnar en bendir á að bein ábyrgð skattgreiðenda þegar kemur að uppbyggingunni sé lítil.

„Keflavíkurflugvöllur er ekki byggður upp af ríkisfé. Hann er byggður upp af þeim rekstri sem við erum með og svo líka lántökum sem við erum með. Þannig að skattgreiðandinn er ekki að senda neina peninga í málið, lánin sem við erum með eru heldur ekki með ríkisábyrgð þannig að þetta lendir ekki á skattgreiðendum,“ segir Björn Óli.

Aftur á móti ber Isavia að skjá til þess að fyrirtækið sé rekið með lágmarksáhættu og þess vegna sé virk áhættustefna sem tryggi stöðu eigandans, ríkisins.

Hann telur að mikill áhugi yrði erlendis frá ef einkaaðilum byðist að kaupa hlut í flugstöðinni.

„Um leið og þessi völlur færi á markað þá mundu mörg mjög stór erlend fyrirtæki skoða hvort þau myndu kaupa hlut í vellinum. Við erum á opnum evrópskum markaði og þeir munu hafa áhuga á að koma inn.“