Laumufarþeginn Abú sást stefna á Hlemm

„Hann er svolítið forvitinn en þetta hefur aldrei gerst áður,“ segir Heiðdís Snorradóttir, eigandi kattarins Abú, sem hvarf nýlega á ævintýralegan hátt.

Nágranni Heiðdísar vissi ekki hvaðan á hann stóð veðrið dag einn fyrir tveimur vikum þegar hann opnaði skottið á bílnum sínum á bílastæðinu við Heklu á Laugavegi. „Þá hoppaði kötturinn út og hljóp í átt að Hlemmi og hefur ekki sést síðan,“ segir Heiðdís. Abú hafði þá laumað sér með í bíltúr ofan úr Breiðholti.

Heima í Eyjabakka bíður systir Abú, læðan Jasmín. Saman fundust þau fimm vikna fyrir fimm árum ásamt tveimur systkinum sínum í pappakassa sem skilinn hafði verið eftir á víðavangi í Borgarnesi. „Það er ótrúlega algengt að fólk losi sig við kettlinga með því að láta þá drepast úti,“ segir Heiðdís sem fékk þau Jasmin og Abú í Kattholti og segir að Jasmín sakni bróður síns sárt. „Hún vill helst bara sofa uppí og fyrstu dagana fór hún út og leitaði að honum um allt.“

Abú og Jasmín ólust upp í Nóatúni fyrstu sjö eða átta mánuðina. „Við héldum að hann myndi kannski leita þangað,“ segir Heiðdís sem kveðst því hafa svipast um eftir Abú í Nóatúni.

„Síðan er ég búin að fara tvær ferðir að útisvæðinu í kring um Háteigskirkju þar sem ég kallaði á hann – eins og kjáni því maður kallar eiginlega ekki kisur til sín,“ útskýrir Heiðdís en tekur þó fram að Abú svari nafni og sé ósköp gæfur og mannblendinn.

Heiðdís segir að fjölskyldan hafi átt heima í Þjóttuseli áður en hún flutti í Eyjabakka. Abú hafi í fyrstu átt það til að strjúka upp í Þjóttusel þar sem tengdaforeldrar hennar búa. „Þannig að hann kann alveg að flakka og er eiginlega alger útiköttur. En hann hefur aldrei látið sig hverfa í meira en sólarhring,“ segir hún.

Engar áreiðanlegar vísbendingar hafa borist um ferðir Abú frá því hann hvarf af planinu við Heklu. Hann er ekki enn með sömu merkingu og á meðfylgjandi mynd. „Abú er bara með græna hálsól núna og tvær bjöllur. En hann er mjög sérstakur í framan og er skemmtilegur og glaðlegur karakter. Hann vill klárlega koma heim og við söknum hans mjög mikið.“