Redknapp hefur áhuga á að stýra Skotum

Skotar eru í leit að nýjum landsliðsþjálfara í kjölfar þess að Gordon Strachan hætti sem þjálfari eftir nýliðna undankeppni.

Gamla brýnið Harry Redknapp er í atvinnuleit eftir að hafa verið rekinn frá Birmingham City í síðasta mánuði. Hann hefur mikinn áhuga á því að taka við af Strachan.

„Að sjálfsögðu hef ég mikinn áhuga. Þetta er örugglega frábært starf og mér fannst Gordon standa sig vel í starfi,“ sagði Redknapp sem kann að smjaðra fyrir Skotunum.

„Ef ég á að vera heiðarlegur þá hef ég frekar verið að horfa á leiki Skotlands en Englands þar sem það er ekkert að gerast í ensku leikjunum. Ég lifði mig virkilega inn í síðustu leiki Skota og sparkaði boltanum með þeim heima í stofu.“