Gylfi spilar ekki með Swansea um helgina | Clement býst við því að hann fari

Paul Clement, knattspyrnustjóri Swansea City, hefur nú gefið það út opinberlega að íslenski landsliðsmaðurinn Gylfi Þór Sigurðsson verði ekki í leikmannahóp liðsins í fyrstu umferð ensku úrvalsdeildarinnar um helgina.

Swansea City heimsækir Southampton á laugardaginn en þar verður enginn Gylfi í búning.

Gylfi hefur verið orðaður við Everton enda hafa félögin verið í viðræðum um kaup Everton á íslenska miðjumanninum. Swansea vill fá 50 milljónir punda fyrir Gylfa og hefur þegar hafnað 45 milljóna tilboði frá Everton.

Paul Clement býst við því að Gylfi fari. „Það nýjast í stöðunni er að það hefur ekkert samkomulagt náðst við neinn klúbb. Það eru viðræður samt í gangi og ég ræði við stjórnarformanninn og eigendurna á hverjum degi til að fá fréttir af gangi mála,“ sagði Paul Clement á blaðamannafundinum í dag.

„Það er samt ekkert óeðlilegt her í gangi. Það koma oft upp aðstæður eins og þessar þegar félag er með leikmann sem það vill halda og er með samning við hann til margra ára. Svo kemur annað félag sem vill fá hann. Þetta hefur gerst áður,“ sagði Clement.

„Við metum leikmanninn á ákveðna upphæð en hitt félagið metur hann á annan hátt. Félögin hafa ekki komist að samkomulagi ennþá og þurfa á endanum að fara einhvern milliveg. Um leið og samkomulag er í höfn þá ættu bæði félög að geta fagnað,“ sagði Clement.

„Sigurðsson verður ekki í hópnum á laugardaginn. Það er enn 10. ágúst og það eru ennþá eftir nokkrar vikur til að ganga frá þessu. Ég býst samt ekki við því að þetta taki allan þann tíma,“ sagði Clement.

„Ég vil að þetta klárist sem fyrst. Ég kann vel við að vinna með honum og hann er mjög góður leikmaður og góð persóna. Alla daga mætir hann og gerir sitt besta á æfingum og það hefur ekkert breyst á meðan þetta hefur verið í gangi,“ sagði Clement.