Handaband lýsandi nafn

Við erum þrjár sem stöndum að verkefninu Handabandi. Erum allar textílhönnuðir og ég er líka iðjuþjálfi, Erla Dís Arnardóttir er handavinnukennari og Andrea Fanney Jónsdóttir klæðskeri. Þannig að við erum gott teymi þegar við sameinum krafta okkar og Handaband er lýsandi nafn,“ segir Guðný Katrín Einarsdóttir.

Hún segir tilgang Handabands að bjóða upp á skapandi starf fyrir fólk sem er utan vinnumarkaðar af einhverjum ástæðum. „Við leggjum áherslu á umhverfisvernd og endurvinnslu og því er allur okkar efniviður bútar sem falla til við fataframleiðslu á Íslandi. Hingað til höfum við eingöngu unnið úr þannig afgöngum og búum til eitthvað alveg nýtt úr þeim.

Höfum verið í samstarfi við Glófa, Cintamani og Hugin Munin, svo nokkrir séu nefndir. Við fáum alls konar efnisbúta, ullarefni, bómullarefni og fleira, skyrtuefni fáum til til dæmis frá Hugin Munin.“

Guðný Katrín segir ekki um föst verkefni að ræða heldur verði hlutir til í hópunum sem mæti og vinni úr efnunum hverju sinni. „Við hönnuðirnir leggjum áherslu á vinnuaðferðir og litapælingar og fólk sem mætir hjá okkur fær þannig leiðbeiningar en engan tilbúinn pakka. Í þessu ferli getur orðið til einhver afurð sem yrði söluvara en hingað til hefur fólk verið að gera einn og einn hlut fyrir sjálft sig.“

Handaband er með aðstöðu í félagsmiðstöð Reykjavíkurborgar á Vitatorgi á mánudögum frá 10 til 12.30 og föstudögum frá 13 til 15.30. Guðný Katrín segir hana opna öllum aldurshópum. „Hingað til hefur meirihluti þeirra sem sækja félagsmiðstöðina verið eldri borgarar en samstarfið við Virk hefur beint þangað fólki sem hefur dottið út af vinnumarkaði af heilsufarsástæðum og er í endurhæfingu. Við erum í hefðbundinni handavinnustofu þannig að þar eru saumavélar og fleira sem við höfum not af.“

Styrkurinn frá Virk er Handabandi mikils virði, að sögn Guðnýjar Katrínar. „Handaband er verkefni sem við trúum á og styrkurinn hvetur okkur til að halda áfram og bæta frekar í. Það hófst sem hugsjón og var þá unnið í sjálfboðavinnu en styrkurinn gerir okkur í raun kleift að halda áfram að vinna að verkefninu og þróa það enn frekar.“