Var hálfnaður þegar faðir hans lést og bókin tók u-beygju

„Ég var byrjaður að skrifa Syndafallið þegar pabbi veikist og leggst inn á Landsspítalann,“ segir rithöfundurinn Mikael Torfason um bók sína Syndafallið. Foreldrar hans, Hulda og Torfi, eru í miðdepli í bókinni en Torfi lést í vor eftir bráð veikindi vegna alkóhólisma.

„Ég er í raun hálfnaður með bókina þegar við pabbi erum komnir til Svíþjóðar ásamt systkinum mínum að leita að lækningu fyrir hann. Á örfáum vikum, þá bara deyr hann og hverfur frá okkur.“

Mikael segir að fráfallið hafi haft mikil áhrif á hann.

„Þetta hafði líka áhrif á samstarf mitt við foreldra mína, bæði pabba og mömmu og bókin tók í raun u-beygju. Allt í einu var ég kominn í það hlutverk að hjúkra pabba og horfa á hann deyja, sem var svipað hlutverk sem hann var í þegar ég var barn og veikur. Ég er ofboðslega þakklátur fyrir foreldra mína varðandi það að þau hafa sýnt mínu brölti mikinn skilning.“

Mikael segir að foreldra hans hafi af ótrúlegu hispursleysi og einlægni verið tilbúin að deila með sér sögu sinni.

„Við erum öll uppfull af allskonar tilfinningum og þversögnum. Við erum oft í mótsögn, langar að vera góð en gerum eitthvað sem er kannski ekki það besta í stöðunni. Við erum oft á mjög slæmum stað í lífinu og lendum úti í horni. Það er enginn skömm.“