Úr ráðherrastóli í uppistand

Guðni Ágústsson er einn vinsælasti stjórnmálamaður sem þjóðin hefur átt og það að öðrum ólöstuðum. Hann var einkum vinsæll vegna orðheppni sinnar og skemmtilegar tilvitnanir hans um menn og málefni hafa fyrir löngu öðlast sjálfstæða tilveru.

„Ætli ég sé ekki meira sem aðstoðarmaður hjá Jóhannesi, en þetta er bara græskulaust gaman. Við segjum skemmtisögur sem eru ekki meiðandi. Ég er í rauninni bara í hlutverki fundastjóra hjá honum. Ég veit nú ekki alveg hvað ég á að segja um tilurðina en hann hefur nú hermt eftir mér í fjölmörg ár og okkur var og er oft ruglað saman,“ segir Guðni um tilurð þess að hann og Jóhannes Kristjánsson settu saman sýninguna Eftirherman og orginalinn, en þeir hafa slegið rækilega í gegn um land allt. Höfuðborgarbúar munu ekki sleppa undan gríninu en þeir félagar munu stíga á svið í Iðnó næstkomandi sunnudag.

„Ég stend nú bara á gati yfir þessum viðtökum, við eigum að baki um fjörutíu sýningar og munum hefja leik í Reykjavík næsta sunnudag hér í Iðnó, því sögufræga húsi og það er mikill heiður að því. Ég átti ekki von á því að fyrrverandi ráðherra myndi draga svo marga að.“

Guðni er ekkert feimin við að ræða það hversu oft honum og Jóhannesi var og er ruglað saman. „Það var nú þannig að mamma mín hafði varann á þegar ég hringdi, hún var ekki viss hvort ég væri ég eða Jóhannes á línunni. Margir héldu að við værum skyldir en tengsl okkar eru í tíunda lið, nánara er það nú ekki. Vissulega hafa fjölmargar sögur flogið um okkur þar sem menn voru ekki vissir hvor væri hvað, eftirherman eða orginalinn.“

Það er kunnara en frá þurfi að segja að Jóhannes Kristjánsson hefur í fjölmörg ár hermt eftir Guðna Ágústssyni og þykir manna bestur í því að umhverfast og breytast í Guðna.

„Jóhannes er magnaður, hann algjörlega holdgervist og verður að þeim sem hann hermir eftir. Röddin, hreyfingar og svipir, hann rennur saman við þann sem að hann er að leika. Algjörlega einstakt. Við náum vel saman, erum hnitmiðaðir og orðsins menn. Lífið fer með mann í ýmsar áttir og hverjum hefði dottið það í hug að ég myndi standa upp úr ráðherrastól og enda á sviði sem skemmtikraftur.“

Lífsins leiksvið eru margvísleg og hlutverkin fjölbreytt. Guðni er nú á nýju sviði þar sem áskoranirnar eru af öðru tagi en á sviði stjórnmálanna.

„Munurinn á því að vera á þingi og vera með uppistand er að nú er staðið upp og klappað fyrir okkur. Ég hef verið í stjórnmálum í tugi ára, það var gefandi en þetta er annarrar gerðar. Ég átti nú ekki von á þessum viðbrögðum en er þakklátur fyrir þau.“