Veiðimenn kirkjunnar hrökklast frá Staðará

Þótt Hæstiréttur hafi í mars dæmt í ágreiningi þjóðkirkjunnar og eiganda jarðarinnar Traða í Staðarsveit á Snæfellsnesi um veiðirétt í Staðará logar þar enn allt í illdeilum.

Oddur Einarsson, framkvæmdastjóri Kirkjuráðs, lagði fram skýrslu um stöðu veiðiréttarmála í Staðará á fundi ráðsins fyrr í þessum mánuði. „Kom fram að framkvæmdastjóri hefði boðið tveimur mönnum að veiða í Staðará um verslunarmannahelgina en hvorugum hefði tekist veiðin vegna áreitni og hótana af hálfu Traðabónda,“ segir um málið í fundargerð Kirkjuráðs.

„Þetta er ósatt,“ segir Gunnar Jónasson, eigandi Traða frá 2013. Þar er rekin ferðaþjónusta. Gunnar kveðst vissulega hafa átt samskipti við veiðimann fyrir landi Traða um verslunarmannahelgina en alls  ekki hafa haft í hótunum um líkamsmeiðingar eins og Oddur Einarsson haldi fram í bréfi til hans. Það hafi viðkomandi veiðimaður staðfest við sig í samtali og sagst hafa leiðrétt við Odd.

Gunnar viðurkennir hins vegar að hann hafi staðið yfir veiðimanninum sem þá hafi ekki nennt að hafa hann „hangandi yfir sér“ og horfið frá.

Nokkrum dögum fyrir verslunarmannahelgi sendi Oddur Einarsson lögmanni Gunnars bréf og kvaðst ætla að bjóða „nokkrum gestum sínum“ að veiða í Staðará þá um helgina. „Og vænti þess að ekki komi til árekstra þeirra á milli og Gunnars eða gesta hans,“ segir Oddur í bréfinu.

Miklar deilur hafa lengi staðið milli Traða og kirkjunnar fyrir hönd prestsetursjarðarinnar Staðastaðar um veiðirétt í Staðará sem er fyrst og fremst góð sjóbirtingsá.

Í maí 2016 dæmdi Héraðsdómur Vesturlands að allur veiðiréttur í Staðará fyrir landi Staðastaðar, beggja vegna árinnar skyldi tilheyra Staðastað. Hæstiréttur komst hins vegar að annarri niðurstöðu í mars á þessu ári og synjaði kirkjumálasjóði um viðurkenningu á því að allur veiðirétturinn fyrir landi kirkjujarðarinnar tilheyrði óskiptur Staðastað. Var litið til þess að þegar Traðir voru ríkisjörð hafi ríkið lýst því yfir að býlinu fylgdi veiðiréttur.

Veiðin er því sameiginleg í óskiptu landi og koma aðilar sér ekki saman um hvernig þeir eiga að deila henni með sér. Traðamenn vilja sitja að veiðinni í sínu landi þar sem ós árinnar er og hafa lagt til að kirkjujörðinni, sem er ofar í landinu, fylgi veiði ofan þjóðvegar. Um þetta er engin sátt.

Guðjón Ármannsson, lögmaður Gunnars, segist nú vinna að því ásamt lögmanni þjóðkirkjunnar að skipta landi jarðanna. Hann vill ekki tjá sig að öðru leyti um stöðu málsins.