Sjáðu frábær tilþrif Elínar Mettu

Landsliðskonan Elín Metta Jensen sýndi frábær tilþrif þegar hún skoraði annað mark Vals í 2-0 sigri á Breiðabliki í Pepsi-deild kvenna í kvöld.

Á 75. mínútu tók Pála Marie Einarsdóttir langt innkast inn á vítateig Blika. Elín Metta tók við boltanum en var fljótt umkringd varnarmönnum gestanna.

En með skemmtilegum snúning á endalínunni tók hún tvo varnarmenn Breiðabliks úr leik. Þegar Elín Metta kom að markteigslínunni vinstra megin þrumaði hún boltanum svo upp í þaknetið og kom Val í 2-0.

Þetta var áttunda mark Elínar Mettu í Pepsi-deildinni í sumar. Hún er markahæsti leikmaður Vals á tímabilinu.

Hlín Eiríksdóttir skoraði fyrra mark Vals og það var heldur ekki af verri endanum. Hún fékk þá boltann inni í vítateig Blika og lyfti honum í fjærhornið framhjá Sonný Láru Þráinsdóttur.

Mörkin úr leiknum má sjá í spilaranum hér að ofan.

Nánar má lesa leik Vals og Breiðabliks með því að smella hér.