Bílstjóri færður til eftir ósætti við ráðherra

Bílstjóri Benedikts Jóhannessonar, fjármála- og efnahagsráðherra, var sendur til annarra starfa innan stjórnarráðsins eftir að honum sinnaðist við ráðherrann í vor.

Samkvæmt heimildum Fréttablaðsins sinnaðist ráðherranum og bílstjóranum þegar sá síðarnefndi, Magnús Helgi Magnússon, kom til að sækja ráðherrann í Alþingishúsið eftir umræður um fjármálaáætlun í vor. Magnús Helgi er enn starfsmaður stjórnarráðsins en ekur í afleysingum fyrir aðra bílstjóra. Magnús hefur ekki viljað tjá sig um málið við Fréttablaðið. „Eins og gefur að skilja er það ekki mitt hlutverk að tjá mig við fjölmiðla ef það tengist vinnunni. Til þess eru aðrir í ráðuneytunum,“ sagði Magnús Helgi í skilaboðum til Fréttablaðsins þegar hann var inntur eftir svörum. Magnús er reyndur ráðherrabílstjóri og áður en hann vann fyrir Benedikt ók hann forverum hans, Bjarna Benediktssyni og Oddnýju Harðardóttur, í tíð þeirra sem fjármálaráðherra. Hann hefur að auki ekið ráðherrum í öðrum ráðuneytum.

Guðmundur Árnason, ráðuneytisstjóri í fjármála- og efnahagsráðuneytinu, segir það gerast oft að bílstjórar fari á milli ráðuneyta og ráðherra. „Það geta verið fyrir því ýmsar ástæður. Oft er þetta nú bara ákveðið í tengslum við stjórnarmyndun eða þegar ný ríkisstjórn tekur við. En það er aldrei litið svo á að sú skipting sé sú endanlega heldur geti verið tilfærslur og breytingar hvenær sem er.“

Guðmundur segist ekki tjá sig um heimildir Fréttablaðsins um að ráðherranum og bílstjóranum hafi sinnast. „Við viljum ekki tjá okkur um sögusagnir,“ segir Guðmundur en ítrekar að það sé algengt að bílstjórar færist til á milli ráðuneyta. „Oft hefur það verið þannig að það hafa myndast tengsl milli manna og menn hafa haldið áfram samstarfi þó að þeir hafi farið milli ráðuneyta eða ríkisstjórna.“

Fréttablaðið hafði samband við aðstoðarmann Benedikts Jóhannessonar í gær. Hann gaf þau svör að ráðherra myndi ekki tjá sig við fjölmiðla um málefni einstakra starfsmanna ráðuneytisins. 

Uppsögn krefst áminningar



Samkvæmt 21. grein og 44. grein laga um opinbera starfsmenn verður starfsmanni ekki sagt upp störfum nema að hann hafi fengið áminningu í starfi áður. Hins vegar segir í 7. grein sömu laga að heimilt sé, án þess að starf sé auglýst laust til umsóknar, að ákveða að starfsmaður sem er ráðinn ótímabundið til starfa flytjist um afmarkaðan tíma eða varanlega milli stjórnvalda enda liggi fyrir samþykki viðkomandi forstöðumanns fyrir flutningnum og starfsmannsins sjálfs.