Guðlaugur Victor á leiðinni til Sviss

Guðlaugur Victor Pálsson er á leiðinni til FC Zürich í Sviss samkvæmt heimildum 433.is.

Miðjumaðurinn hefur verið á mála hjá danska liðinu Esbjerg, en liðið féll úr dönsku úrvalsdeildinni á síðasta tímabili. Guðlaugur Victor var fyrirliði liðsins síðasta tímabil, en vildi yfirgefa herbúðir félagsins eftir fallið.

Guðlaugur Victor er 26 ára gamall og hefur komið við sögu í sex leikjum með íslenska A-landsliðinu. 

Hann hefur verið hjá Esbjerg síðan 2015 þegar hann kom frá Helsingborg í Svíðþjóð. Árin 2009-11 var Guðlaugur Victor á mála hjá enska stórliðinu Liverpool og var fyrirliði varaliðs félagsins, en náði ekki að skapa sér sæti í aðalliðinu.