Moka upp 15 þúsund rúmmetrum á sólarhring

Belgíska fyrirtækið Jan De Nul sér um dýpkun Landeyjahafnar. Sérútbúið skip dælir jarðefnum úr höfninni á vorin og haustin þegar sandburður er sem mestur. Skipið mokar upp um 15 þúsund rúmmetrum á sólarhring.

Jan De Nul gerði viðhaldssamning vegna Landeyjahafnar árið 2015 og hóf starfsemi við höfnina í september það ár. Upphaflegur samningur hljóðaði upp á þrjú tímabil en samningurinn hefur síðan verið lengdur og hefur þegar verið samið um veru Jan De Nul í Landeyjahöfn frá febrúar 2018 til maí 2018,“ segir Mark Proctor, verkefnastjóri Jan De Nul á Íslandi.

Á fyrsta tímabilinu var notast við skipið TSHD Tacolla en síðan þá hefur skipið TSHD Galilei 2000 verið notað við dýpkun hafnarinnar þar sem það þótti hentugra. Einnig gerði tæknisvið Jan De Nul breytingar á skipinu til að það næði til fjarlægustu horna í höfninni.

Skipverjar Galilei eru 15 sem starfa í sex vikur í senn. Dýpkunaraðgerðir fara fram frá febrúar og fram í maí og frá september fram í nóvember. „Á þessum tíma eru unnið daglega eftir því sem veður leyfir og þá unnið allan sólarhringinn,“ útskýrir Mark.

Aðaldýpkunaraðgerðir fara fram á vorin og haustin. „Veðrið á vorin og haustin er líklegast til að draga sand inn í höfnina enda stormar tíðir. Minni líkur eru á sandsöfnun í höfninni á rólegri sumarmánuðum og því þarf ekki stöðugt viðhald á þeim tíma,“ lýsir Mark.

Hann bendir á að þegar sjórinn nái yfir þriggja metra ölduhæð aukist sandflæði til muna inn í höfnina. „Hins vegar höfum við einnig séð hið gagnstæða. Í sumum stormum hefur efni úr höfninni flotið út úr henni. Þetta fer allt eftir vindátt og styrk stormsins.“

Frá því Jan De Nul tók við dýpkun Landeyjahafnar árið 2015 hefur einni milljón rúmmetra af efni verið dælt upp úr höfninni og aðliggjandi svæðum. „Á einum sólarhring getur dýpkunarskipið mokað upp um 15 þúsund rúmmetrum.“

Mark segir verkefnið í Landeyjahöfn að mörgu leyti krefjandi og þar spili íslenska veðráttan stóran þátt.

„Að starfa innan hafnar sem er í fullri notkun getur verið erfitt auk þess sem það getur verið krefjandi að vinna í svo mikilli nálægð við hafnargarðinn,“ lýsir hann. Hins vegar hafi starfmenn Jan De Nul mikla reynslu af keimlíkum aðstæðum en fyrirtækið hefur starfað við viðamikil verkefni á borð við Palm Island II í Dúbaí, Chek Lap Kok flugvöllinn sem er í Hong Kong og nýja Súesskurðinn í Egyptalandi.