Jóhann Berg lagði upp mark átta mínútum eftir að hann kom inn á

Jóhann Berg Guðmundsson lagði upp mark Burnley í 2-1 tapi fyrir Bournemouth á Vitality vellinum í næstsíðustu umferð ensku úrvalsdeildarinnar í dag.

Jóhann Berg kom inn á sem varamaður á 75. mínútu. Átta mínútum síðar sendi hann boltann á kollinn á Sam Vokes sem skoraði sitt fjórða mark í jafn mörgum leikjum. Þetta var önnur stoðsending Jóhanns Berg í ensku úrvalsdeildinni í vetur.

Junior Stanislas kom Bournemouth yfir á 25. mínútu en Vokes jafnaði á 83. mínútu eins og áður sagði. Aðeins tveimur mínútum síðar skoraði Joshua King sigurmark Bournemouth. Þetta var hans sextánda mark í vetur en hann er í hópi markahæstu leikmanna ensku úrvalsdeildarinnar.

Bournemouth er komið upp í 10. sæti deildarinnar en Burnley er í því fjórtánda.

Southampton lagði fallið Middlesbrough-lið á Riverside, 1-2.

Jay Rodriguez og Nathan Redmond skoruðu mörk Southampton sem situr í 9. sæti deildarinnar. Patrick Bamford skoraði mark Boro sem mun leika í B-deildinni á næsta tímabili.

Gylfi Þór Sigurðsson lagði upp mark í 0-2 sigri Swansea City á Sunderland.

Í fyrsta leik dagsins vann Manchester City svo 2-1 sigur á Leicester City.