Bayern meistari fimmta árið í röð

Bayern München er Þýskalandsmeistari fimmta árið í röð. Þetta var ljóst eftir 0-6 stórsigur Bayern á Wolfsburg í dag.

Bayern hefur gengið illa að undanförnu og er dottið úr leik í Meistaradeild Evrópu og þýsku bikarkeppninni.

Liðið sýndi hins vegar allar sínar bestu hliðar í dag og lét leikmenn Wolfsburg finna til tevatnsins.

Robert Lewandowski skoraði tvívegis fyrir Bayern og þeir David Alaba, Arjen Robben, Thomas Müller og Joshua Kimmich sitt markið hver.

Philipp Lahm, fyrirliði Bayern, hefur nú átta sinnum orðið þýskur meistari. Lahm leggur skóna á hilluna eftir tímabilið og kveður með enn einum titlinum.