Trump krefst atkvæðagreiðslu um Trumpcare í dag

Donald Trump, forseti Bandaríkjanna, krefst þess að þingmenn greiði atkvæði um hið nýja sjúkratryggingakerfi sem hann hefur kynnt ekki síðar en í dag. Þingmenn Repúblikana frestuðu atkvæðagreiðslu um frumvarpið á dögunum.

Nýja kerfinu er ætlað að koma í staðinn fyrir hið svokallaða Obamacare, sjúkratryggingakerfinu sem Obama, forveri Trump í embætti, kom á og Trump varði stórum hluta kosningabaráttu sinnar í að gagnrýna.

Trump hefur nú látið smíða nýtt kerfi sem gengur undir nafninu The American Healthcare Act. Til stóð að kjósa um málið á þingfundi í gær en andstaða nokkurra þingmanna Repúblikana kom í veg fyrir það.

Forsetinn er sagður hafa sett þingmönnunum úrslitakosti – að annað hvort yrði kosið um nýja frumvarpið í dag, ella sætu menn uppi með Obamacare.

Frestun atkvæðagreiðslunnar var nokkuð áfall fyrir Trump sem hafði staðhæft að hann hefði stuðning þingmanna í fulltrúadeild þingsins til að afgreiða málið svo öldungadeildin gæti tekið frumvarpið til meðferðar.

Óeining er hins vegar um málið innan raða Repúblikana þar sem sumum finnst gengið allt of langt í því að tryggja fólki heilbrigðisaðstoð á meðan öðrum finnst gengið of skammt.

Mesta andstaðan er þó á meðal íhaldsamra Repúblikana sem finnst nýja frumvarpið of líkt Obamacare.