Lagfæringu lokið á sjókví eftir að umtalsvert magn regnbogasilungs slapp úr fiskeldi

Matvælastofnun fór í eftirlit hjá Arctic Sea Farm á laugardag í kjölfar tilkynningar fyrirtækisins um gat á sjókví með regnbogasilungi í Dýrafirði. Búið er að loka gatinu en ekki er að svo stöddu vitað hve margir fiskar hafa sloppið. Ljóst er að sá regnbogasilungur sem slapp í umhverfið síðastliðið sumar kom ekki úr þessari sjókví og eru þær slysasleppingar áfram til rannsóknar hjá stofnuninni.

Eftirlitsmaður Matvælastofnunar fór í eftirlit að starfsstöð Arctic Sea Farm við Haukadalsbót í Dýrafirði síðastliðinn laugardag en fyrirtækið hafði tilkynnt um gat á kví til Fiskistofu og Matvælastofnunar.

Enn er óljóst hvenær og hvernig gatið myndaðist en netið hefur verið lagfært. Fyrirtækið hefur látið kafara yfirfara aðrar kvíar og búnaðinum verður öllum skipt út á þessu ári.

Starfsmenn fyrirtækisins höfðu í samráði við Fiskistofu lagt net við kvína og í eftirlitsferðinni á laugardaginn voru þau dregin um borð í vinnubát fyrirtækisins og færð til samkvæmt tilmælum eftirlitsmanns Fiskistofu. Enginn regnbogasilungur var í netinu og mun Fiskistofa ákveða næstu skref er varða eftirlitsveiðar á svæðinu.

Í tilkynningu frá Matvælastofnun segir að ekki sé hægt að áætla hversu margir fiskar hafa sloppið fyrr en starfsmenn fyrirtækisins hafa lokið við slátrun úr kvínni en áætlað er að það verði í lok febrúar eða í byrjun mars. Um er að ræða geldan og sjúkdómalausan regnbogasilung sem er ekki fær um að fjölga sér í íslenskri náttúru.

Í tilkynningu Arctic Sea Farm til fjölmiðla fyrir helgi kom fram að töluverður fjöldi fiska gæti hafa sloppið og að þarna hefði mögulega fundist skýring á veiðum á regnbogasilungi á Vestfjörðum síðastliðið sumar. Matvælastofnun segir þó útilokað að málin tengist og bendir í því ljósi á að flestir þeir fiskar sem veiddust af eftirlitsmanni Fiskistofu á Vestfjörðum síðasta sumar voru um hálft kíló að þyngd. Á sama tíma og þær veiðar stóðu yfir var fiskurinn í þeirri kví sem nú um ræðir um tvö kíló, en meðalþyngd fiska í kvínni er nú fjögur kíló.

Rannsókn Matvælastofnunar á mögulegum sleppingum regnbogasilungs síðastliðið sumar er enn í gangi og liggja endanlegar niðurstöður ekki fyrir að svo stöddu. Fylgst verður með fjölda slátraðra regnbogasilunga úr þeim kvíum á Vestfjörðum sem ala fisk sambærilegan þeim sem Fiskistofa veiddi í eftirlitsferð sinni og mun framhald rannsóknarinnar byggja á þeim upplýsingum.