Ríkharður Jónsson látinn

Ríkharður Jónsson, einn besti knattspyrnumaður Íslands fyrr og síðar, lést í gærkvöldi en hann var 87 ára ára gamall. Skagafréttir greina frá þessu.

Ríkharður Jónsson átti magnaðan knattspyrnuferil og átti meðal annars markamet landsliðsins í næstum því fjóra áratugi.  Hann er ennþá daginn í dag þriðji markahæsti leikmaður íslenska landsliðsins frá upphafi.

Ríkharður skoraði 17 mörk í 33 landsleikjum og átti metið frá 2. júlí 1948 þar til að Eiður Smári Guðjohnsen sló það 13. október 2007.  Landsliðsmörk Ríkharðs Jónssonar.

Ríkharður er enn sá sem hefur skorað flest mörk í einum landsleik en hann skoraði fjögur mörk í eftirminnilegum sigri á Svíum á Melavellinum 29. júní 1951.

Ríkharður varð sex sinnum Íslandsmeistari sem leikmaður, fyrst 1947 með Fram og svo fimm sinnum með Skagamönnum þar sem hann var spilandi þjálfari liðsins í öll skiptin. Ríkharður þjálfaði einnig meistaralið Skagamanna sumrin 1960 og 1970.

Ríkharður lék með Fram meðfram námi í Reykjavík en þegar hann snéri aftur upp á Akranes þá bjó hófst mikil sigurganga Skagamanna sem urðu fimm sinnum Íslandsmeistarar frá 1951 til 1958. ÍA varð þá fyrsta liðið utan Reykjavíkur til að verða Íslandsmeistari í fótbolta. Ríkharður Jónsson lék alls 184 leiki með ÍA og skoraði í þeim 136 mörk þar af skoraði hann 68 mörk í 95 leikjum í efstu deild. Meira um feril Ríkharðs hjá ÍA hér.

Ríkharður æfði með Arsenal 1959 og var boðinn samningur hjá enska stórliðinu en  alvarleg bakmeiðsli komu í veg fyrir frama hans í enska boltanum. Hann snéri því aftur heim en spilaði ekki fótbolta aftur fyrr en sumarið 1962.

Ríkharður Jónsson er einn af fimmtán meðlimum íslensku heiðurshallarinnar en hann var tekinn inn í Heiðurshöll ÍSÍ þann 30. desember 2015. Ríkharður er einn þriggja knattspyrnumanna í Heiðurshöllinni en hinir eru Albert Guðmundsson og Ásgeir Sigurvinsson.

Ríkharður var formaður ÍA um árabil og er nú heiðursfélagi Íþróttabandalags Akraness, Knattspyrnufélags ÍA og Íþrótta- og Ólympíusambands Íslands. Hann hefur verið sæmdur æðstu heiðursmerkjum ÍSÍ og KSÍ auk þess sem honum hefur verið veitt fálkaorða íslenska lýðveldisins.