Ofurparið Tanja og Egill blogga um ferðalögin sín og lífstíl

Athafnakonan Tanja Ýr Ástþórsdóttir, sem var kosin ungfrú Ísland árið 2013, og Egill Halldórsson, eigandi viðburðarfyrirtækisins Wake up Reykjavík, halda bæði úti ferðabloggsíðu þar sem þau sýna frá ferðalagi þeirra beggja en Tanja og Egill eru í sambandi.

Þau fóru á dögunum til Marokkó og ætla síðan að halda áfram að segja frá ferðalögum sínum. Tanja er nokkuð stór í snyrtivörubransanum og heldur úti sínu eigin fyrirtæki.

„Til að byrja með langaði mig rosalega mikið að vera með stærri „platform” þar sem ég gæti deilt mínum persónulegu ráðum varðandi hitt og þetta, yfirleitt tengt snyrtivörum, tísku og einhverju í þá áttina. Í dag hins vegar hefur þetta stækkað alveg mjög mikið og snýst fyrst og fremst um ferðalög, lífsstíl og snyrtivörur.“

Hún segist nota Snapchat og Instagram daglega og en finnst einnig mikilvægt að eiga bloggið líka.

„Þar get ég komið ítarlegra inn á hlutina sem mér finnst mikilvægir og þá er líka alltaf hægt að finna það - Annað en á samskiptamiðlunum þar sem það getur verið erfitt að finna gamla pósta - eða hreinlega ómögulegt eins og á Snapchat.“

Egill er nokkuð sammála kærustunni.

„Hingað til hef ég verið að hjálpa erlendum ferðamönnum að upplifa Reykjavík á sem skemmtilegastan hátt - en hugmyndin að þessu glænýja bloggi er einfaldlega að sameina ástríðu mína fyrir því að skrifa texta, ásamt því að ferðast um heiminn jafnt sem landið okkar og upplifa öðruvísi mat og drykk.“

Hann hefur umgengist ferðamenn núna nánast daglega í nokkur ár og gerir sér grein fyrir því hversu mikilvægt það er að fá góð ráð. 

„Markmiðið er því að gefa góð persónuleg meðmæli hvort sem það er varðandi ferðalög eða veitingastaði hér í Reykjavík til dæmis - Og auðvitað hafa ótrúlega gaman að því á meðan,“ segir Egill sem var að byrja sjálfur að blogga og mun halda því áfram á næstunni.