Selur syndir upp í Svarfaðardalsá

Óvenjuleg sjón mætti hestamönnum í útreiðartúr meðfram bökkum Svarfaðardalsár á dögunum. Á sandeyri í ánni á móts við jörðina Gröf lá selur í makindum sínum. Hann hafði þá synt um tíu kílómetra upp með ánni frá ós hennar sunnan við Dalvík.

Að sögn viðmælanda fréttastofu lá selurinn drjúga stund á sandeyrinni, en þegar hestamennirnir komu nær stakk hann sér til sunds í ánni. Hann var þá kominn inn fyrir kirkjustaðina Tjörn og Velli. Kvaðst viðmælandinn ekki hafa heyrt um að selur hafi synt svo langt upp í ána.

Það er væntanlega silungurinn í ánni sem freistar selsins en Svarfaðardalsá þykir góð bleikjuveiðiá. Einnig veiðist urriði í ánni og nokkrir laxar nást einnig á land á sumrin. Selir eru því ekki vel séðir af veiðimönnum né veiðiréttareigendum, eins og dagbókarfærsla veiðimanns í rafræna veiðibók Svarfaðardalsár fyrir þremur árum ber með sér, skráð 7. september 2014: 

„Selur skotinn neðan við Sökku. Sem veiðimanni finnst mér ekki að eiga sér stað að það sé selur upp um alla á. Er óánægður með þetta að það sé ekki fylgst með þessu.“ 

Þessi selur virðist hafa verið skotinn innan Friðlands Svarfdæla, sem nær um dalbotninn frá sjó og að merkjum Tjarnar og Grundar. Skotveiði er bönnuð innan friðlandsins.

Mörg dæmi eru um að selir syndi upp með veiðiám langt inn í land. Örnefnið Selfoss í Ölfusá vísar raunar til þess. Þannig sást selur í Soginu fyrir landi Bíldsfells í byrjun september og var þá kominn upp fyrir bæði Þrastarlund og Álftavatn. Laxveiðimenn voru ekki á því að gefa þeim sel grið, eins og álykta má af frásögn Morgunblaðsins: 

„Var þetta tilkynnt strax en hann var á bak og burt þegar selaskyttan mætti á svæðið.“ 

Í sömu frétt kvartar laxveiðimaður undan því að selur sé ekki lengur skotinn í ósi Ölfusár „..þar sem það fer víst fyrir brjóstið á blessuðum túristunum sem flykkist þangað til að dáðst að honum“. 

Hér má sjá myndband af selnum í Svarfaðardalsá sem Hjörleifur Helgi Sveinbjarnarson tók um síðustu helgi: