Markaðssetning skiptir öllu máli

Glerhjúpur Hörpu mun á næstu dögum sýna á táknrænan hátt eyju sem sekkur í sæ til þess að vekja athygli á hnattrænni hlýnun. Þetta er gert í tengslum við ráðstefnu um orkumál sem fer fram á næstu dögum. Gera má ráð fyrir að þær upplýsingar sem koma fram á ráðstefnunni séu dýrmætar fyrir þá sem tengjast orkumarkaðinum en þátttökugjald á ráðstefnuna eru litlar 1660 evrur eða um 210.000 krónur.

Skiptir markaðsetning svona miklu máli?

„Já hún gerir það, ef þú hugsar um þau fyrirtæki sem þú þekkir eða koma beint upp í kollinn, það eru fyrst og fremst þau fyrirtæki sem eru góð i að markaðssetja sig, stóru fyrirtækin eins og apple, er apple tölva betri? Hún er betur markaðssett. Tvennt vil ég að gerist annars vegar á alheims mælikvarða að fólk átti sig á því hversu miklu máli markaðssetning skiptir, en hérna heima eru skilaboðin mín þessi. Orka er ekki til í eins miklu magni eins og við vitum, það vantar orku á Íslandi, þess vegna eigum við að selja hana á hæst verði og við eigum að nota lögmál vörumerkjastjórnunnar til að hækka verðið á okkar orku sem við seljum til útlanda,“ segir Dr. Friðrik Larsen, skipuleggjandi ráðstefnunnar.

Íslenskt sprotafyrirtæki ætlar að fara nýstárlega leið til að koma skilaboðum áleiðis með því að sýna á táknrænan hátt eyju sem sekkur í sæ og hvernig viðbúnaðarstig er við hnattrænni hlýnun og hækkandi yfirborði sjávar. Þetta ert gert á glerhjúp Hörpunnar.

„Við vonum að við náum að kveikja í orkufyrirtækjunum að vilja fara þessa leið að horfa ekki meira á framboðshlutann heldur eftirspurnarhlutann. Það er að segja hjálpa fyrirtækjum að nýta orkuna betur,“ segir Einar Sævarsson, framkvæmdastjóri Activity Stream.

Tveir af gestum ráðstefnunnar fóru hringferð um landið á rafmagnsbíl og með ferðinni vildu þeir sýna fram á að það er raunhæfur kostur að skipta yfir í rafmagnsbíl en ferðin gekk ekki áfallalaust fyrir sig.

„Í eitt skiptið þegar við vorum að hlaða bílinn í ónefndum bæ urðum við að dvelja þar í 6 klukkustundir yfir daginn. Ég skildi bíldyrnar eftir opnar og geit nokkur komst inn í bílinn því hún vildi verða samferða okkur til lokaáfangastaðar,“ segir Stuart McBain, endurskoðandi.