Breytingin sem kom of seint

Nýr veruleiki blasir við Arsenal á næsta tímabili. Eftir að hafa spilað í Meistaradeild Evrópu undanfarin 19 ár þurfa Skytturnar að gera sér Evrópudeildina að góðu á næsta tímabili.

Arsenal gerði sitt í lokaumferð ensku úrvalsdeildarinnar í gær, vann 3-1 sigur á Everton þrátt fyrir að vera manni færri í 76 mínútur. Sigurinn dugði þó ekki til því á sama tíma vann Liverpool 3-0 sigur á Middlesbrough og hélt 4. sætinu.

Þetta eru mikil vonbrigði fyrir Arsenal sem hefur ekki endað jafn neðarlega í ensku úrvalsdeildinni síðan tímabilið 1995-96. Þá var Arsene Wenger að þjálfa í Japan.

Frakkinn er undir mikilli pressu og það liggur ekki enn fyrir hvort hann verður áfram með Arsenal. Tímabilinu er þó ekki lokið því Arsenal mætir Chelsea í úrslitaleik ensku bikarkeppninnar á laugardaginn. Skytturnar eiga möguleika á að vinna bikarkeppnina í þriðja sinn á síðustu fjórum árum og kannski er það útgönguleið  fyrir Wenger; að kveðja með titli.

Wenger hefur fengið mikla gagnrýni á tímabilinu, fyrir að vera of þver, þrjóskur og neita að horfast í augu við vandamálin.

Frakkinn brást þó á endanum við og sýndi að hann er kannski enn fær um hugsa hlutina upp á nýtt og bregðast við aðstæðum. Arsenal steinlá fyrir Crystal Palace, 3-0, 10. apríl. Viku síðar sótti Arsenal Middlesbrough heim og þá stillti Wenger upp í tískuleikkerfið 3-4-3. Þetta var mikil breyting en þriggja manna vörn hafði ekki sést hjá Arsenal í tvo áratugi.

Skytturnar unnu nauman sigur á Boro, 1-2, sem var byrjunin á afar góðum endaspretti liðsins. Arsenal vann sjö af síðustu átta leikjum sínum í ensku úrvalsdeildinni auk þess sem liðið bar sigurorð af Man­chester City í undanúrslitum ensku bikarkeppninnar. Breytingin á leikkerfinu var svo sannarlega til batnaðar en hún kom aðeins of seint.

Leikmönnum Arsenal virðist líða vel í þessu nýja leikkerfi og þá sérstaklega í varnarleiknum. Eftir breytinguna hefur Arsenal aðeins fengið á sig sex mörk í níu leikjum og haldið fjórum sinnum hreinu. Hinn ungi og efnilegi Rob Holding átti góða innkomu á lokasprettinum og vörnin virkaði öruggari. Arsenal endaði með 75 stig sem er fjórum stigum meira en liðið fékk á síðasta tímabili. Þá endaði Arsenal í 2. sæti.

Stórum spurningum varðandi Arsenal er ósvarað. Óvíst er hvort Wenger verður áfram og Alexis Sánchez og Mesut Özil hafa ekki framlengt samninga sína. Stjórnarmenn Arsenal verða að finna réttu svörin við þessum spurningum. Annað er ekki í boði.