Vörubílsstjóri sýndi einstaka takta þegar bremsur eftirvagns festust

Lunkinn vörubílstjóri sýndi mikla takta í Kaliforníu í vikunni þegar bremsurnar á eftirvagni sem hann var að draga festust. Hann þurfti því að keyra með eftirvagninn á hlið niður bratta og hála brekku, til að komast út af þjóðveginum.

Myndband úr einum lögreglubíl sem fylgdi vörubílnum niður brekkuna sýnir hve erfitt þetta hefur verið. Einn lögregluþjónninn segir í talstöðina þegar bílinn er kominn niður brekkuna að hann hafi alls ekki átt von á því að þetta mundi heppnast.

Loka þurfti þjóðveginum í einungis tuttugu mínútur vegna atviksins og vörubílstjórinn gat haldið ferðinni áfram skömmu seinna eftir að hafa lokið viðgerðum á eftirvagninum.